Əgər vətəndaşın iş yeri bankımızla əməkdaşlıq etmirsə, o zaman vaxtı bitmiş "Bolkart"ın dəyişdirilməsi üçün bir qədər gözləməlidir.

Bu barədə Axar.az-a müddəti bitmiş "Bolkart"ların vaxtının uzadılması ilə bağlı danışarkən "Bank of Baku"dan bildiriblər.

Bankdan verilən məlumata görə, iş yeri üzrə bankla əməkdaşlıq olmadıqda, "Bolkart"ların müddəti uzadılmır:

"Fəaliyyət göstərilən müəssisənin bankımızla əməkdaşlığı varsa, o zaman arayış təqdim olunmaqla "Bolkart"ın müddəti uzadıla bilər. Hazırda bu proses tərəfimizdən yalnız köhnə müştərilərə şamil olunur. Yeni müştərilərə isə ümumiyyətlə "Bolkart" verilmir. Əgər vətəndaşın iş yeri bankımızla əməkdaşlıq etmirsə, o zaman bir qədər gözləməlidir. Şərtlər dəyişdikdə və kartlar yeni müştərilərə verilməyə başladıqda, o zaman onun məsələsinə də baxılacaq. Bunun üçün kartın tarixçəsinin korlanmaması əsasdır".

Hüquqşünas ekspert Əkrəm Həsənov isə bildirib ki, iş yeri üzrə bankla əməkdaşlıq olmadıqda müddəti bitmiş "Bolkart"ın vaxtının uzadılıb-uzadılmaması bankın öz şəxsi fəaliyyəti çərçivəsində olan məsələdir:

"Bank "Bolkart"ın vaxtını uzatmaq və yeni kredit vermək istəmirsə, bu, bankın öz işidir. Yəni, qanunsuz deyil. Ancaq məsələnin faktiki tərəfinə baxmaq lazımdır. Ümumiyyətlə, banklar hazırda milli valyutada kredit vermirlər. İstənilən müqavilənin müddəti bitdikdə yenidən uzadılmırsa, bu, prinsipcə normaldır. İstər iş yeri üzrə bankla əməkdaşlıq olsun, istərsə də olmasın, bank "Bolkart"ın vaxtını uzatmağa məcbur deyil".