"Qazın verilməsi ilə bağlı hal-hazırda heç bir problem yoxdur".

Bu sözləri "Axar.az"a partlayış səbəbindən Binəqədi rayonuna qaz verilişinin məhdudlaşdırılmasının aradan qaldırılıb-qaldırılmadığı sualına cavab olaraq "Azəriqaz"ın mətbuat katibi Araz Ağayev deyib.

O, Binəqədi rayonu ərazisində mavi yanacağın verilməsində heç bir problemin olmadığını bildirib.

"Azəriqaz"ın Binəqədi Rayon Qaz İstismarı İdarəsindən isə redaksiyamıza açıqlamada mavi qazın verilməsində məhdudiyyətlərin hələ də tam aradan qaldırılmadığı qeyd olundu: "Mövcud durumla bağlı hazırda təmir-bərpa işləri aparılır. Bəzi sahələrə qazın verilməsindəki məhdudiyyət aradan qaldırılmayıb".

Xatırladaq ki, dünən Binəqədi rayonu 8-ci mikrorayon, Süleyman Sani Axundov küçəsindəki ümumi sahəsi 600 kv.m olan yarımçıq tikilidə partlayış baş verib. Baş vermiş hadisəylə bağlı Binəqədi rayonunda mavi qazın verilməsi dayandırılıb.