İdxal rüsumlarının aradan qaldırılması ilə bağlı danışıqlarda ABŞ hakimiyyəti xarici ölkələrdən Çinlə ticarəti məhdudlaşdırmağı tələb etmək niyyətindədir.

Axar.az xəbər verir ki, bu barədə “Voll Strit Jurnal” mənbələrə istinadən məlumat yayıb.

“ABŞ Çini təcrid etmək üçün tarif danışıqlarından istifadə etməyi planlaşdırır. Maliyyə naziri Skott Bessent qarşılıqlı tariflərdə güzəştlər müqabilində ticarət tərəfdaşlarından Çinin öz iqtisadiyyatlarında iştirakını məhdudlaşdırmasını istəyir”, - məlumatda bildirilib.

Nəşr yazıb ki, Ağ Ev xarici ölkələrdən Çinə öz əraziləri vasitəsilə mal tədarükünü qadağan etməyi, Çin şirkətlərinin orada ofis açmasına imkan verməməyi, Çindən gələn ucuz sənaye komponentlərinin onların bazarına daxil olmasına şərait yaratmamağı tələb edəcək:

“Dəqiq tələblər Çinin iqtisadiyyatına cəlb olunma dərəcəsini nəzərə alaraq, ölkədən ölkəyə əhəmiyyətli dərəcədə dəyişə bilər”.

Mənbə bildirib ki, ABŞ administrasiyasında Çinə təzyiqin əsas tərəfdarı maliyyə naziri Bessentdir. Onun təklif etdiyi tədbirlərdən biri də Çin şirkətlərinin səhmlərinin ABŞ birjalarında ticarətinə qadağa qoyulmasıdır.