Maliyyə Nazirliyinin vahid xəzinə hesabının milli valyutada olan 1 milyard manatlıq sərbəst qalığını 3 ay müddətinə 7,21 faiz orta illik gəlirliliklə yerli banklarda depozitə yerləşdirməsi bank sektorunda likvidliyin dəstəklənməsi baxımından müsbət qiymətləndirilir.

Bu barədə Axar.az-ın sorğusuna cavab olaraq Mərkəzi Bankdan bildirilib.

Qurumdan qeyd edilib ki, bu əməliyyat Maliyyə Nazirliyi ilə Mərkəzi Bank arasında mövcud koordinasiya çərçivəsində həyata keçirilib:

“İlkin qiymətləndirmələrə görə, bu əməliyyat bank sektorunda likvidliyi artırdığı üçün qısamüddətli faizlərə azaldıcı təsir göstərmişdir. Bu tip əməliyyatların uzunmüddətli depozit və kredit faizlərinə təsiri üçün bir qədər zaman lazımdır. Bu istiqamətdə nəticələr əldə olunduqca geniş ictimaiyyətə məlumat veriləcək”.

Qeyd edək ki, bu addım Azərbaycanda dövlət vəsaitlərinin idarə edilməsində yeni yanaşma hesab olunur və büdcəyə əlavə gəlir mənbələrinin formalaşdırılmasına yönəlib.