Azərbaycanın gələcəyi üçün 5 böyük layihənin həyata keçirilməsi çox vacibdir və bu addımlar indiki hökumətdən sonra da mütləq atılmalıdır, çünki Ddövlət adlanan institutun 10-15-20, hətta 50 illik vizionu, planları olmalıdır.

Axar.az xəbər verir ki, bu barədə iqtisadçı Natiq Cəfərli qeyd edib.

O, Azərbaycanın uzunmüddətli iqtisadi və geosiyasi maraqlarına xidmət edən beş mühüm layihəni sadalayıb:

“1. Zəngəzur dəhlizinin açılması və ümumilikdə Cənubi Qafqazda bütün nəqliyyat və kommunikasiya xətlərinin işlək vəziyyətə gətirilməsi;

2. Türkmənistandan Azərbaycana qaz boru kəmərinin çəkilməsi;

3. Qazaxıstandan Xəzər dənizinin dibi ilə neft boru kəmərinin inşası;

4. Azərbaycanın enerji habı və logistika mərkəzi olması ilə yanaşı, ölkənin neft emalı mərkəzinə çevrilməsi üçün böyük zavodların inşası və yenidən qurulması – Azərbaycan xam neft satan ölkədən öz neftinin və Qazaxıstan neftinin emalı mərkəzinə çevrilməlidir. Bir barrel neftin emalından əldə olunan gəlir bir barrel xam neftin satışından gələn gəlirdən 7-8 dəfə çoxdur;

5. Azərbaycanın regional “bazara” çevrilməsi baş verməlidir, bunun üçün “aşırı tənzimləmə” qaydaları, dövlət nəzarətedici qurumların bir çoxu ləğv edilməli, yeni vergi-gömrük qanunvericiliyi işlənib hazırlanmalıdır”.

Ekspertin fikrincə, bu addımlar Azərbaycanın iqtisadi müstəqilliyini və beynəlxalq mövqeyini möhkəmləndirəcək.