"Teatrımızda nə narazılıq edən, nə də aksiyaya hazırlaşan var. Bizim aktyorlar aksiyanı səhnədə edir".

Bu sözləri "Axar.az"a Azərbaycan Dövlət Akademik Milli Dram Teatrının direktoru İsrafil İsrafilov dram aktyorlarının etiraz aksiyasına hazırlaşmasına münasibət bildirərkən dedi.

Direktor deyir ki, bu, saytların boşluqdan yaydığı şayiədir: "Bu xəbəri baharın gəlişi ilə yenilik olsun deyə yayıblar. Ancaq qətiyyən belə bir hal yoxdur teatrımızda. Narazılıq olsaydı, hiss edərdim. Aktyorlar da bunu şəxsən özümə bildirərdilər".

İ.İsrafilov aktyorlarla heç bir probleminin olmadığını da əlavə etdi: "Mən aktyorlarla daimi ünsiyyətdəyəm".

Xatırladaq ki, "Aznews.az"a adlarının çəkilməsini istəməyən aktyorlarının verdiyi xəbərə görə, teatrın direktoru İsrafil İsrafilovun idarəçilik sistemi, islahat adı ilə gördüyü işlər kollektivi həvəsdən salıb və hövsələdən çıxarıb. Aktyorlar yaxın günlərdə bir yerə toplanaraq İsrafil İsrafilovun teatrda rəhbər kimi istefasını tələb edəcəklərini bildiriblər.