Belə bir iddia var ki, pislik genetik faktordur. Hətta ABŞ və İtaliya kimi nəhəng dövlətlərdə bəzi cinayətkarlar sırf bu faktoru irəli sürərək güzəşt almağa nail olublar. Ancaq alimlər genetikanın insan həyatındakı rolunu vurğulasalar da, hələ bu fikrin doğruluğu ilə bağlı qəti qərar verməyin əsassız olduğunu deyiblər.

Axar.az Qaynarinfo-ya istinadən xəbər verir ki, türk alimi Qorqud Ulucan CNN telekanalının "Gündəm Özəl" verilişində məsələyə belə aydınlıq gətirib:

"Pislik bir davranış formasıdır. Əgər davranışlardan söhbət gedirsə, təbii ki, bioloji səbəblər gözardı edilə bilməz. Burada müəyyən gen daşıyan hüceyrələri, hormonları sadalaya bilərik. Mövzuyla bağlı daha çox Finlandiyada araşdırmalar aparılır. Həbsxanada olan, dəfələrlə cinayət işləmiş, qatil olmuş insanla normal, sakit həyat sürən insanın genləri, həyatı araşdırılıb və belə nəticəyə gəlinib ki, həqiqətən də məhbusun davranışlarına səbəb gen faktoru ola bilər.

Amma təəssüf ki, belə deyil. Əgər həqiqətən də pislik və ya yaxşılıq gen vasitəsilə ötürülsəydi, o zaman biz bunu əvvəlcədən müəyyənləşdirə və hər hansı müdaxilələr edə bilərdik. Təbii ki, aldatma, şiddət kimi xüsusiyyətlər gen ilə ötürülə bilər. Amma tibbin bugünki inkişaf səviyyəsində qəti şəkildə pis insanın övladı pis, yaxşınınkı yaxşıdı deyə bir dəyərləndirmə aparmaq çox böyük səhv olar".