Artıq bir neçə gündür ki, unudulmaz sənətkar Səxavət Məmmədovun qardaşı Firuz Səxavət "Axar.az"a zəng edərək, "Gör Azərbaycanı kimlərin əlində qoyub gedirik" başlığı ilə gedən müsahibəsindəki foto-silsilədən "divarda Məhəmməd Əmin Rəsulzadənin şəkli görünən" fotolarını çıxarılmasını xahiş edir. Müğənninin dediyinə görə, bunun üçün onu incidirlər.

Məsələ digər xəbər saytlarının da gündəmində olub. Bir sıra incəsənət adamları bu məsələyə münasibət bildirərək Firuz Səxavətin bu hərəkətinin doğru olmadığını bildiriblər. Xanəndə ilə bağlı Xalq artisti Baloğlan Əşrəfov da etirazını dilə gətirdi.

"Axar.az"a danışan Xalq artisti dedi ki, Firuz Səxavətin bu cür davranması heç də təqdir edilən deyil:

"Əgər ölkə başçısı Məhəmməd Əmin Rəsulzadənin adının əbədiləşdirilməsi ilə bağlı sərəncam veribsə, kiminsə belə bir hərəkət etməsi doğru deyil. Sənətçiyə yaraşan odur ki, dövlət başçısının təbrik etdiyi adama hörmət qoysun. Firuz Səxavət bu cür davranışı ilə səhv hərəkət edib".