8 mart Beynəlxalq Qadınlar gününü təklif edən və bu günün yaradıcısı olan Klara Setkin Azərbaycana da səfər edib.

Kult.az xəbər verir ki, alman siyasətçisi, kommunist hərəkatının fəal iştirakçısı, Almaniya Kommunist Partiyasının yaradıcılarından biri, qadın hüquqlarının müdafiəçisi Klara Setkin 1924-cü ildə Əli Bayramov adına klubda olur. O, klubu “inqilabi qüvvələrin toplanış məntəqəsi” adlandırır.

«Qafqaz od içində» kitabında o, yazırdı: “Sovet İttifaqının şərq və cənub-şərq respublikalarındakı müsəlman qadınların klubu proletar inqilabının yetirməsi, onun canlı təcəssümüdür. Müsəlman qadınlarında, yüzilliklər ərzində həyatın kütləşdirici şəraitinə baxmayaraq, insanlıq ləyaqəti və insan hüquqlarını əldə etmək səyi oyanır. Müsəlman qadınların klubu bu cəhətdən, böyük vəzirin qızının dəbli Avropa kostyumuna və ya bir neçə dövlətli müsəlman qızın Parisdə, Londonda və ya Berlində təhsil almalarına baxmayaraq, güclü və inandırıcı sübut kimi çıxış edir”.