Rayçel Midin "Ovçular və qurbanlar" silsilə kitabları əsasında çəkilmiş "Vampirlər akademiyası" Amerika filminin yaradıcıları, deyəsən, satış müvəffəqiyyətsizliyindən heç də dilxor olmayıblar. Rus aktyoru Danila Kozlovski və çəkilişin digər iştirakçıları filmin çəkilişlərinin davam etdirlməsi üçün pul yığımında fəal iştirak edirlər. Əvvəlcədən aparılmış hesablamalara görə, "Ovçular və qurbanlar"ın ekran variantının ikinci hissəsinin çəkilişlərinə başlanılması üçün 1,5 milyon ABŞ dolları lazımdır.

Axar.az xəbər verir ki, çəkiliş qrupunun üzvləri Yutubda üç dəqiqəlik video yerləşdiriblər. Onlar pərəstişkarlara öz minnətdarlıqlarını bildirirlər. Prodüserlər əmindirlər ki, əgər yaxın günlərdə ilk 1,5 milyonu toplamaq mümkün olarsa, tezliklə digər investorlar da filmin maliyyələşdirilməsinə töhfələrini verəcəklər.

Xatırladaq ki, "Vampirlər akademiyası" rejissor Mark Uotersin Rayçel Midin "Ovçular və qurbanlar" silsiləsindən olan ilk eyniadlı kitabının motivləri əsasında çəkilib. Süjetin mərkəzində Vampirlər akademiyasında sehrbazlıq və cadugərlik sənətini öyrənən şahzadə Lissa və onun rəfiqəsi dayanır.