Panton Rəng İnstitutu 2018-ci ilin bütün mövsümlərində ultrabənövşəyi rəngdə geyimlərin aktual olacağını açıqlayıb.

Bu sözləri Kult.az-a açıqlamasında modelyer Zümrüd Mirzəliyeva söyləyib. O, bu il də əvvəlki mövsümlərdə olduğu kimi, geri qayıdan dəbin izinin görünəcəyini deyib:

“Ən dəbli rənglərə gəldikdə isə ultrabənövşəyiyə bu rənglər əlavə olunacaq: pomidor rəngi, yumşaq və aydın (təmiz) mavi, qırmızı və qəhvəyinin qarışığı (çili yağı), boz-çəhrayı, mavi-yaşıl, pastel çalarları. Bu rənglər baharda olduğu kimi, yayda da əsas rənglər olacaq. Ancaq bu qarderobunuzu sadaladığım rənglərlə əvəz etməlisiniz demək deyil, rahat olduğunuz, sizə yaraşan geyimləri geyinin. Çünki modanı yaxalamaq mümkün deyil, ancaq tərziniz əbədidir.

Baharın parçaları bahalı velvet və məxmər, həmçinin dəridir. Şifon, saten və küpür - bunlar isə həmişə aktual və maraqlı olan parçalardır.

Kəmərli çantalar, pantolon kostyumlar, tək çiyin üzərində siluet, payetlər, hündür bel, enli zolaq və s. geyimlər bu mövsümdə də dəbdə olacaq”.