Yazıçı Kamal Abdullanın yeni hekayələr kitabı nəşr olunub.

Axar.az xəbər verir ki, "Sirri–Zəmanə" adlanan kitabda yazıçının müxtəlif illərdə qələmə aldığı hekayələr toplanıb.

Hekayələr "Sehirbazlar dərəsi", "Parisin seçimi", "Labirint", "Bilgə əhvalatları", "Balaca həyətin həngamələri", "Səhvlərimizin qrammatikası" adlı 6 silsilədə təqdim olunur.

Qəhrəmanların subyektiv həyat təcrübəsi və obyektiv gerçəklik, hadisələr və onların təbiəti haqqında tarixən formalaşmış mühafizəkar-ənənəvi təsəvvürlərin gözlənilməz rakurslardan yozumu, mifloloji və arxetipik motivlərin də yer aldığı mistifikasiyalar, xəyali və yaxud paralel dünya təsiri bağışlayan, fizika qanunlarının belə tamam fərqli məntiqlə işlədiyi zaman və məkan labirintləri – bütün bunlar, üstəgəl müəllifin bənzərsiz üslubu və təhkiyəsi bu hekayələrin kaloritini təşkil edir.

Nəfis tərtibatla "Mütərcim" nəşriyyatında çap olunmuş kitabın arxa üzündə müxtəlif hekayələrdən çıxarışlar və Kamal Abdullanın yaradıcılığı haqqında Salam Sarvanla Etimad Başkeçidin sözləri verilib.

Kitabın redaktorları Əliş Mirzallı və Şəlalə İsmayılzadədir.