Azərbaycan Dövlət Gənc Tamaşaçılar Teatrı Rusiyanın Perm şəhərində keçiriləcək I Beynəlxalq Martin MakDonax Festivalına dəvət alıb.

Axar.az xəbər verir ki, oktyabr ayının 7-dən başlayan və oktyabrın 14-dək davam edəcək festivalda teatrın kollektivi dramaturqun "Lineynin trilogiyası"na daxil olan "Yalqız Qərb" əsəri əsasında hazırlanmış eyniadlı tamaşa ilə çıxış edir.

Quruluşçu rejissoru Böyük Britaniyadan dəvət olunmuş teatr rejissoru Yan Uilem Van Den Boş, rejissoru Gülnar Hacıyeva, işıq üzrə rəssamı Maykl Manyon, quruluşçu rəssamı Elizabet Kuk, rəssamı Elşən Sərxanoğlu, musiqi tərtibatçısı Zaur Rəşidov olan tamaşada rolları Nigar Məmmədova, Rasim Cəfərov, Anar Səfiyev, Vüsal Mehrəliyev ifa edirlər.

"XXI əsrin əsas dramaturqu", "Müasir səhnənin möcüzəsi" və digər ləqəblərə malik Martin Makdonaxın da iştirakının nəzərdə tutulduğu festivalda həmçinin Moskva Bədaye Teatrı (Moskva), Sankt Peterburqun Böyük Dramatik Teatrı, Almaniya, Avstriya, Perm, Bosniya-Hesoqovina, Çexiya, Polşa, İjevsk və digər ölkələrin teatr kollektivləri iştirak edir.

Xatırladaq ki, keçən mövsümdə Azərbaycan Dövlət Gənc Tamaşaçılar Teatrı, Mədəniyyət və Turizm Nazirliyi və "British Council" Azərbaycan nümayəndəliyinin birgə layihəsi çərçivəsində Oskar mükafatçısı Martin MakDonaxın "Lineyn Trilogiyası"na daxil olan "Lineynin Gözəllik kraliçası", "Konnemarada bir kəllə" və "Yalqız Qərb" tamaşalarını səhnələşdirib.