Oktyabrın 22-dən 24-dək Bakıda AMEA-nın Mərkəzi Kitabxanasının İnformasiya Resursları Mərkəzində "Sələflər və xələflər" mövzusunda I Beynəlxalq Simpozium keçriləcək.

AMEA-nın Nəsimi adına Dilçilik İnstitutu tərəfindən təşkil edilən beynəlxalq tədbir Əli bəy Hüseynzadənin 150 və akademik Məmmədağa Şirəliyevin 105 illik yubileylərinə həsr olunacaq.

Bu barədə Axar.az-a Nəsimi adına Dilçilik İnstitutunun mətbuat katibi Təranə Şükürlü açıqlama verib. T.Şükürlü bildirib ki, dilçiliyin problemlərinin müzakirə olunacağı bu konfransa dünyanın 20-ə yaxın ölkəsindən nümayəndə dəvət olunub. Beynəlxalq Simpoziumda Azərbaycan, Türkiyə, Qazaxıstan, İran, Polşa, Ukrayna, Özbəkistan və digər ölkələrdən olan görkəmli alimlər müxtəlif mövzularda məruzələr edəcəklər.