Ana səhifə Kult |
Bu gün Azərbaycan aşıq sənətinin tanınmış nümayəndələrindən olan Aşıq Vüqar Mahmudoğlunun anım günüdür.
Kult.az xatırladır ki, Aşıq Vüqar Mahmudoğlu 2018-ci il yanvarın 10-da infarktdan dünyasını dəyişib.
Gözlənilməz vəfatı ilə Şirvan elini sarsıdan Aşıq Vüqara ötən bir il ərzində sənət yoldaşları şeirlər həsr edib.
Aşıq Vüqarın əziz xatirəsinə həsr edilən şeirlərdən bəzilərini təqdim edirik:
Zamanı deyildi bu ayrılığın
Bu ayrılıq qəfil düşdü araya
Zamanı deyildi bu ayrılığın
Loğmanlar da yetəmmədi haraya
Zamanı deyildi bu ayrılığın
Ömrün bahar çağı, yaz zamanıydı,
Gülün bülbülünə naz zamanıydı
Bir söz vədəsiydi, saz zamanıydı
Zamanı deyildi bu ayrılığın.
Bağında çiçəklər açırdı hələ
Ətrini ətrafa saçırdı hələ
Qəm-qüssə də səndən qaçırdı hələ
Zamanı deyildi bu ayrılığın
Sən bir el oğluydun, el aşığıydın.
Oba vurğunuydun, el aşiqiydin
Elimin, obamın yaraşığıydın
Zamanı deyildi bu ayrılığın
Bəzərdin məclisi Qobustanıyla
Öz sazı, öz sözü, öz dastanıyla
Ölümün səhv düşən bu ünvanıyla
Zamanı deyildi bu ayrılığın
Məktəb partasında bir bəstə qaldı
Yanıq könüllərdə şikəstə qaldı
Daha qulağımız bu səsdə qaldı
Zamanı deyildi bu ayrılığın
Vüqar, səni indi kimdən soruşaq?
Mizrabdan soruşaq, simdən soruşaq?
Nə loğmandan, nə həkimdən soruşaq?
Zamanı deyildi bu ayrılığın
Gethagetdi, köçhaköçdü elə bil
Dədə Mahmud bir də köçdü elə bil
Ürəyimdən bir ox keçdi elə bil
Zamanı deyil bu ayrılığın.
Daşqın Sabiroğlu
***
Nə tez gəlib çatdı bir ilin başa?!
Nə nakam toxundu bəxt oxun daşa?!
Vüqar Mahmudoğlun arama daha
İndi yana - yana yaşahayaşa
Rəhmin gəlmədimi 47 yaşa?!
Dağı dağ üstündən çəkdiniz qoşa
Dedin ki biçarə anam ölüncə
Döysün iki əlli başahabaşa
Zalim fələk sürgün etdi birbaşa
Köç edib döndünüz qanadlı quşa
Biri Mahmud dərdi, birisi Vüqar
Çəkin illər boyu qoşahaqoşa
Sənsiz yovuşmuram dosta, tanışa
Daha söz tutmayır dilim danışa
Don vurdu qönçəsin soldurdu gülün
Döndü fəsillərim qışahaqışa
Qarışdın torpağa döndün sal daşa
Sağalmaz dağ çəkdin yara, yoldaşa
İncinin ümidin puç edən Vüqar
Getdi ümidlərim boşahaboşa
Çal
Ustad Abuzər, balabanı asta çal
Ərməğan et, Vüqar kimi dosta çal
Anaların fəryadına rəhm elə
İlham ilə Fərizəni səslə, çal
Ustad Abuzər, balabanı asta çal
Bir az həzin, bir az kövrək pəstə çal
Nakam gedişi ilə fani dünyadan
Aşıq Vüqar etdi məni xəstə, çal
Ustad Abuzər, balabanı asta çal
Həsrət, hicran dayanıbdı qəsdə, çal
İthaf elə əziz xatirəsinə
Vüqara bir şikəstə de, bəstə çal
***
Oxşadım Vüqarı laylasın çaldım,
Boyuna yalvardım qadasın aldım
Bu sevgini sevənlərə çox gördü
Həsrətin əlində giriftar qaldım
Məqsədi, məramı qəsddi fələyin
Onsuz da amalı nəsdi fələyin
Qoydu yarı yolda aşıq Vüqarı
Amansız rüzgarı əsdi fələyin
Yandı ürəyimin başı, ay Vüqar
Düşdü üzüyümün qaşı, ay Vüqar
Səni tək İnci yox, bütün Şirvanın
Oxşadı torpağı, daşı, ay Vüqar.
İnci Şirvanlı
***
Səs ver mənim harayıma, hayıma
Aşıq Mahmud, Vüqar sənə gəlir, hey...
Bu itki də düşdü ömür payıma,
Bu ayrılıq bağrımızı dəlir heyyy...
Aşıq Mahmud, Vüqar sənə gəlir, heyyy...
Şirvan eli kədərlənir, ağlayır,
Gəlin-qızlar başa qara bağlayır,
Bu son gediş ürəkləri dağlayır-
Nə çəkirik təkcə Allah bilir, heyyy..
Aşıq Mahmud, Vüqar sənə gəlir, heyyy...
Elin oğlu, qızı nalə qoparır,
Yetim qalan sazı nalə qoparır.
Qadir Allah yaxşıları aparır
Pislər qalır, yaxşı kəslər ölür, hey...
Aşıq Mahmud, Vüqar sənə gəlir, heyyy...
Xəyyam Mirzə
***
Apardın
Zalım əcəl, nəydi qəsdin-qərəzin,
Necə qıydın şirin cana, apardın!
Arzuları çiçək açan aşiqi,
Nə tez çəkdin imtahana? Apardın!
Ürəyində getdi neçə arzular,
Bu acı xəbəri duyan qan ağlar.
Yas tutub Vüqara qocaman dağlar,
Bürüdün ağ kəfən-dona, apardın.
Görən geri dönəcəkmi bu bahar,
O dəyərli insan, gözəl sənətkar.
Xamisin qəlbinə dolub qəm-qubar,
Əzrail, vermədin aman, apardın!
Aşıq Xamis Xanışoğlu, 11.01.2018
***
Yalvarım
Sən sazsız-söhbətsiz durmazdın bir an,
Bəs niyə gəncliyin tez oldu viran.
Əlacın duyanı yaradan quran,
De, hansı əldəsə ələ yalvarım.
Ömür gülşəninə nə tez yağdı qar,
Həkimlər dərdinə qaldılar naçar.
Qardaş, bu dərmanın harda, kimdə var,
Gəzim dağı-daşı, elə yalvarım.
Həyat aşıq üçün yaranıb cəfa,
Ölümə dərman yox, ömrə vəfa.
Sənə həkimlərdən olmadı şəfa,
Qoy ana torpağa belə yalvarım.
Aşıq Rza, 11.01.2018
***
Apardı
Nə yaşa baxmadı, nə insanlığa,
Nə rəhmi gəlmədi bu cavanlığa.
Vaxtsız gələn əcəl bircə anlığa,
Aman da vermədi, aldı apardı...
“Ölüm Peşrosu”nu çaldı, apardı...
Yeri məclislərdə yuxarı başda,
Xətrini istərdi dost da, yoldaş da.
Nə deyim fələyə, bu cavan yaşda,
Könlümüzü dərdə saldı, apardı,
“Ölüm Peşrosu”nu çaldı, apardı...
Adı yaraşırdı şəxsiyyətinə,
Həmişə sadiqdi saf niyyətinə.
Ata sənətinə, öz sənətinə,
Arzuları yarım qaldı, apardı,
“Ölüm Peşrosu”nu çaldı, apardı...
Xəyyam Məmmədov
***
Nə tez oldu bu səfər
Nəvən hələ sənə saz gətirməmiş,
Yaşın üstə bir yaş yaz gətirməmiş.
Mahmudun yarası köz gətirməmiş,
Aşıq Vüqar, nə tez oldu bu səfər?
Bir sədəfli saz da asılı qaldı,
Neçə bəy gəlinin vüsalı qaldı.
Təqvimdə neçə toy yazılı qaldı,
Aşıq Vüqar, nə tez oldu bu səfər?
Nə tez söndü axı eşqin həvəsin?
Ədəbdə, ərkanda olmaz əvəzin.
Saraylarda qaldı nəfəsin, səsin,
Aşıq Vüqar, nə tez oldu bu səfər?
Şirvan üstə idi hər şövqün, şəstin,
Kərəmi, Şikəstə içrə bitmişdin.
İslamla görüşmü təyin etmişdin,
Aşıq Vüqar, nə tez oldu bu səfər?
Dedilər köçmüsən sənət yoldaşım,
Eşitcək sinəmə əyildi başım.
Əmi kimi kimdən soruşsun Haşım?
Aşıq Vüqar, nə tez oldu bu səfər?
Aşıq Haşım Qubalı, 11 yanvar 2018
Tarix
2019.01.10 / 09:07
|
Müəllif
Kult.az
|