Dünyasını dəyişən dünya şöhrətli müğənni Maykl Ceksonun həyatının qaranlıq tərəflərindən bəhs edən “Livinq Nevrlənd” adlı sənədli filmin yayımlanmasından sonra sənətçinin nüfuzu sürətlə azalmağa başlayıb.

Kult.az xəbər verir ki, sənədli filmdə müğənninin pedofiliyada ittiham edilməsindən sonra Yeni Zelandiya və Kanadada bir neçə radio kanalı M.Ceksonun mahnılarına qadağa qoyub.

M.Cekson fanatları isə onlayn musiqi platformalarından albomlarını dinləməyərək boykot etməyə və sosial mediada tənqid etməyə başlayıb.

“Simsonlar” animasiya serialının prodüseri sənədli filmi izlədikdən sonra Ceksonun qonaq olduğu bölümün filmdən çıxarılmasına qərar verdiyini açıqlayıb.

Ceksonun 3 övladı və anasına qoyduğu sərvətin də sürətlə azaldığı qeyd edilir. Analitiklərin təxminlərinə əsasən, belə davam edərsə, Cekson ailəsi televiziya və radio yayımlarından, müqaviləsi olan müxtəlif şirkətlərdən və s. ümumilikdə 493 milyon dollar itirəcək.

Xatırladaq ki, M.Cekson 2009-cu il iyunun 29-da dünyasını dəyişib. Onun ölümündən sonra sərvəti 9 ildə 9 milyard dollar artmışdı.