Rusiyada yaşanan iqtisadi böhran avtomobil bazarını uçuruma sürükləyir.

Axar.az xəbər verir ki, Avropa Müəssisələr Birliyinin (AEB) məlumatına görə, mart ayında avtomobil satışı ölkədə əvvəlki dövrlərə nisbətən 43 faiz geriləyib. Belə ki, ötən ay Rusiyada 139850 ədəd avtomobil satılıb. Halbuki, 2014-cü ilin eyni dövründə 243332 ədəd avtomobil satılmışdı.

Rublun devalvasiyası, idxal olunan ehtiyat hissələrinin qiymətinin qalxması satışa mənfi təsir edib.

"General Motors" Sank-Peterburqda olan fabrikini bağladıqdan sonra "Opel" və "Chevrolet" də şimal qonşumuzda istehsaldan imtina edib. "Volksvagen", "Peugeot" və "Citroen" isə işçilərin kütləvi ixtisarına hazırlaşır.

Rusiyanın ən böyük avtomobil istehsalçısı "AvtoVAZ-Renault-Nissan"ın mart ayında satışı 31 faiz, bazarda ikinci böyük satıcı olan "Volksvagen" 48 faiz, Rusiya bazarında 3-cü böyük paya sahib olan "Hyundai" isə 15 faiz itki ilə üzləşib. Bu göstərici "Toyota"da 27 faiz, "Kia"da isə 32 faizdir. "General Motors"un satışı 76 faiz, "Ford" 73 faiz, "PSA/Peugeot-Citroen"in satışı isə 79 faiz geriləyib.