Dünən İngiltərənin Viktoriya və Albert Muzeyinin direktoru Martin Rot Azərbaycan Xalça Muzeyində olub.

Axar.az xəbər verir ki, Azərbaycan Respublikasının Mədəniyyət və Turizm naziri cənab Əbülfəs Qarayev Viktoriya və Albert Muzeyinə Qarabağın "Bəhmənli" xalçasının surətini hədiyyə edib.

Xalçanın əsli Azərbaycan Xalça Muzeyində saxlanılır və üzərində toxucunun adı və xalçanın toxunma tarixi – "Hicri 1346 Nargilə xanım" yazısı həkk olunub. "Bəhmənli" xalçalarının naxışları XV əsrdən etibarən Azərbaycanda toxunmağa başlayan məşhur "Əjdahalı" xalçalarının interpretasiyasıdır. "Əjdahalı" naxışları Azərbaycana Böyük İpək Yolu vasitəsilə gəlib və Azərbaycan xalça sənətinin inkişafında mühüm rol oynayıb.

Hədiyyə olunan xalça 2014-cü ildə Azərbaycan Xalça Muzeyində Lalə Əliyeva tərəfindən toxunub.

Xatırladaq ki, Martin Rot Bakıya Londonda Təbiətin Mühafizəsi üzrə Beynəlxalq Birliyin "Qırmızı kitab"ının 50 illik yubileyinə həsr edilmiş "Bu gün burada" adlı sərgi zamanı Heydər Əliyev Fondunun vitse-prezidenti Leyla Əliyeva tərəfindən dəvət olunub. Aprelin 9-da direktoru Azərbaycan Respublikasının Mədəniyyət və Turizm naziri Əbülfəs Qarayev qəbul etmişdi.