"Ssenari müəllifi aktyor seçiminə qarışmamalıdır".

Bu sözləri yazar, tərcüməçi İmir Məmmədli ssenari müəllifi olduğu, Mədəniyyət və Turizm Nazirliyinin sifarişi ilə çəkiləcək "Köşk" filmi haqda Axar.az-a danışarkən deyib:

"Köşk" filmi komediya janrındadır. Mövzusu məhəbbət, dostluq, yurd-yuva hissidir – bir sözlə, orda çox şey var, əvvəlcədən bunların hamısını sadalamaq çətindir, inşallah, film çəkilər, baxarıq. Filmin quruluşçu rejissoru Mirsadiq Ağazadədir. Aktyorların seçimi də quruluşçu rejissorun işidir. Düşünürəm ki, ssenari müəllifi aktyor seçiminə qarışmamalıdır. Bu günə qədər ekranlaşdırılan əsərlərimdə də rejissora aktyor barədə təklif verməmişəm. Filmin ssenarisi sifarişlə yazılmayıb, ideya özümün idi. Əsəri yazıb qurtardıqdan sonra kinostudiyaya təqdim etdim. Həmin ərəfədə orada müsabiqə elan olunmuşdu. Ssenarim müsabiqənin qalibi oldu, sonra bədii şuraya çıxardılar, əsər bədii şuranın da rəğbətini qazandı. Bu barədə söz düşmüşkən deyim, bir azərbaycanlı kimi mənim üçün çox xoşdur ki, kinostudiyamızda da, bədii şurada da təqdim olunan əsərə belə obyektiv münasibət var. Yeri gəlmişkən, "Köşk"ə dəyər verən bütün insanlara təşəkkürümü bildirirəm. Film ilin sonuna qədər ekranlaşdırılacaq".

Qeyd edək ki, hazırda "Azərbaycanfilm" kinostudiyasında iki yeni bədii filmin – "Köşk" və "Postskriptum"un çəkilişlərinə hazırlıq gedir.