Özbəkistan Respublikasının Nazirlər Kabineti yanında Xarici ölkələrlə mədəni əməkdaşlıq üzrə Dostluq Cəmiyyətləri Şurasının təşkil etdiyi "Tassano-2015" xalqların Mətbəx festivalında bu il Azərbaycan da təmsil olunub.

Axar.az xəbər verir ki, festivalda Azərbaycan üçün ayrılmış guşədə milli mətbəximizi əks etdirən xörəklər, şirniyyatlar, habelə milli suvenirlər, kəlağayılar, Azərbaycanın turizm resurslarına dair nəşrlər nümayiş etdirilib.

Tədbirin rəsmi açılışında çıxış edən Dostluq Cəmiyyətləri Şurasının icraçı direktoru Kəmaləddin İşıdxocayev tədbirin əhəmiyyətindən danışıb, festivalın xalqların öz mədəniyyətlərini, milli mətbəxlərini nümayiş etdirmək üçün əlavə imkanlar verdiyini qeyd edib.

Festival çərçivəsində təşkil olunan konsertdə Azərbaycanı təmsil edən rəqs ansamblı "Uzundərə", "Yallı" milli rəqslərimizi ifa edib.

Festivalın sonunda iştirakçı dövlətlərin təqdim etdiyi milli mətbəx nümunələrinə münsiflər heyəti tərəfindən baxış keçirilib və qaliblər mükafatlandırılıb.

Azərbaycan səfirliyi və onun mədəniyyət mərkəzi münsiflər heyətinin xüsusi mükafatı ilə təltif olunub.