"4.1 Şəhər Motivləri" bədii filminin beynəlxalq premyerası baş tutub.

Axar.az xəbər verir ki, 25-ci Kotbus Beynəlxalq Film Festivalının (Almaniya) "Fokus" proqramı çərçivəsində keçirilən təqdimatda filmin yaradıcı heyəti də iştirak edib.

Xaricdə ali kino təhsili almış beş gənc iddialı rejissorun lentə aldığı kinoalmanaxda bu günədək yalnız neft və Avroviziya Mahnı Müsabiqəsi ilə adı hallanan Bakının yuxarıdan və aşağıdan, beş fərqli janrda beş fərqli təsviri (evin eyvanından, tikinti kranından, avtomobilin pəncərisindən) lentə alınıb.

Qeyd edək ki, Azərbaycan Prodüserlər Gildiyasının elan etdiyi "Geniş baxış" ssenari müsabiqəsinin qalibi olan kinolayihəyə "Qonşu qadın" (rejissor Anar Abbasov, operator Aleksey Şepilev), "Kədərim" (rejissor Rüfət Həsənov, operator Mixail Belkin), "Yuxarıda və aşağıda" (rejissor Timur İsmailov, operator Nadir Mehdiyev), "Dmitrov küçəsi 86" (rejissor Cəfər Axundzadə, operator Əlişir Həmidhocayev), və "Zabit şərəfi" (rejissor Vüqar İslamzadə, operator Cəbrayıl Rəfiyev) filmləri daxildir. Yeni filmin quruluşçu rəssamı Rafiq Nəsirov, redaktoru Yusif Şeyxov, kreativ prodüseri Eldar Albertsson, icraçı prodüseri Azər Quliyev, prodüserləri Müşfiq Hətəmov ("Azərbaycanfilm") və İradə Bağırzadədir ("Adari films").