Yanvar ayının sonlarında paytaxtın Dilarə Əliyeva küçəsində yerləşən binada partlayış olmuşdu. Qaz sızması nəticəsində baş verən partlayışdan sonra binanın istifadəyə yararlı olub-olmaması haqqında rəsmi məlumat verilməyib, lakin tikilidə yerləşən obyektlər və mənzillərdə normal həyat davam edir.

Axar.az xəbər verir ki, görünüşü və çoxmərtəbəliliyi ilə fərqlənən binada həyat öz axarındadır. Bərpa olunmayan yeganə yer isə partlayışın baş verdiyi obyektdir. Obyektə ən yaxın olan aptek əvvəlki qaydasında işləyir.

Aptekin əczaçısı əməkdaşımıza açıqlamasında bina ilə bağlı problemin aradan qaldırıldığını və onların fəaliyyət göstərməsi üçün heç bir maneənin olmadığını bildirdi. Həmin binanın sakinləri isə yaşayış üçün icazə verildiyini söylədilər.

Məsələ ilə bağlı Axar.az-a açıqlama verən Azəriqaz İstehsalat Birliyinin ictimaiyyətlə əlaqələr şöbəsinin müdiri İbrahim Kəlbəliyev elə yanğın baş verən gün problemin aradan qaldırıldığını və binanın qazla təmin edildiyini, bina zədələnmədiyi üçün heç bir problem olmadığını bildirdi.

Qeyd edək ki, yanvar ayının 27-da Dilarə Əliyeva küçəsində çoxmərtəbəli yaşayış binasının (birinci-üçüncü mərtəbələri qeyri yaşayışdır) zirzəmisində yanğınla nəticələnən partlayış baş verib.

Hadisə zamanı yanıq xəsarətləri alan dəftərxana ləvazimatlarının satıcısı 1961-ci il təvəllüdlü Mahmudov Zahid Şükür oğlu vəfat edib.