"Varislər" layihəsində

Bizim oxucu və tamaşaçı zövqümüzüm formalaşması çox vaxt böyük yazıçı, illüstrator-rəssam, tərcüməçi və b.-larının uşaqları, nəvə-nəticələrindən asılı olur. Məhz bu varislər nəyin harada və nə qədər nəşr olunacağını təyin edirlər. Məhz onların sayəsində yeni, əvvəllər heç yerdə çap olunmamış əsərlər, gündəlik və məktublar ortaya çıxır. Məhz onların entuziazm və zəhmətkeşliyi doğma yazıçıları, onların yubileylərini, haqqındakı xatirələri unudulmağa qoymur.

Axar.az bu layihəsində oxucularına məşhur yazıçı, şair, tərcüməçi və naşirlərin doğma övladları və bu ya digər yolla onların varisləri olmuş insanların taleyindən danışacaq.

"Dəhşətlər kralı" Stiven Kinq qüsursuz və təmiz ailəsi ilə hörmətə layiqdir. O, həyat yoldaşı Tabita ilə artıq toylarının qırx illiyini qeyd edib, üç övlad böyüdüb. "Bizim nikahımız bütün dünya liderlərindən daha uzunömürlü oldu, Kastrodan başqa. Və bir halda ki, biz indiyədək söhbətləşir, mübahisə edir, məhəbbətlə məşğul olur və "Ramonesa"nı rəqs ediriksə - habba-habba-hey! – demək, bizdə alınıb".

Tələbələr – Stiven və Tabitanın tanışlığı romantik örtüyə bürünüb. 1969-cu ildə gələcək mistik bestsellerlər müəllifi Men ştatı kitabxanasında işləyirdi. Bir dəfə özü kimi tələbə həmkarları ilə universitetin kitab rəfləri arasındakı dostları ilə birlikdə piknik təşkil edir. Kinq sarı saçlı, qəribə gülüşlü qızı ilk dəfə elə oradaca görür. Onu Tabita Sprüs deyə çağırırdılar. Kinq fikirləşir ki, yəqin, yerli pisseriyanın mütaliəni sevən ofisiantlarındandır. Lakin yanılmışdı. Stiva və Tabbini söz, dil və həyatlarının mənasına çevrilmiş işləri birləşdirirdi. Göy otların üstündə qurulmuş səhər yeməyinə qatılıb içi mürəbbəli şirniyyat yeyən qız, sən demə, yazıçılıqla məşğul olurmuş. Kinq sonralar etiraf edirdi ki, o, gələcək qadınına poeziya seminarında vurulub: ona görə ki, müəllif işinin onunçün nə demək olduğunu anlayır, ona görə ki, onun əynində ağlı başdan alan qara paltar və ipək corablar var idi.

Fəhlə təbəqəsinin nümayəndələri

Toy il yarımdan sonra baş tutur. Stiven Kinq özündə və sevimli qadınında çoxlu oxşar cizgilər tapır. "Biz hər ikimiz də fəhlə sinfinin eyni təbəqəsindənik, ikimiz də ət yeyirik, siyasətdə demokratları dəstəkləyirik və bütün yankilər (avropalıların ABŞ-da doğulmuş amerikanlara verdiyi ad – tərc.) kimi Yeni İngiltərə dışındakı həyata şübhə ilə yanaşırıq. Biz məhəbbətdə də bir-birimizə uyğunuq və vahid nikah tərəfdarıyıq".

Həyat yoldaşı "dəhşətlər kralına" həm həyatda, həm də yaradıcılıqda sadiq tərəfdaş oldu. "Kerri" romanının ilk üç səhifəsini zibil vedrəsindən çıxarıb ərini süjet üzərində işləməyə vadar edən də məhz Tabita oldu. Əsər Kinqə böyük şöhrət gətirdi. Onu alkoqolizm və narkomaniyanın girdabından da məhz o, çəkib çıxardı. O, ərini seçim qaşısında, iki yol ayrıcında qoydu: ya yardımı qəbul etməli, kakoin bükümlərindən, alkoqoldan xilas olmalı və yaşamalı idi, ya da qapı açıq idi... Çünki nə arvadı, nə də uşaqları onun özünü necə məhv etməsinə sakitcə tamaşa edə bilmirdilər. Kinqin əlyazmalarının ilk oxucusu və ən kəskin tənqidçisi, rəyçisi də Tabita idi. 1999-cu ildə qəzadan sonra bərpa dövrü keçərkən onun yenidən ayağa qalxmasına və yenidən qələmə sarılmasına da məhz sevimli qadını kömək etmişdi.

İkinci pivə şüşəsindən sonra

Toydan üç il sonra tələbə Kinqlərin ailəsində artıq iki uşaq tərbiyə alırdı – bir-birinin ardınca doğulan qızı Naomi Reyçel və oğlu Cozef Hillstorm.

Cozef Kinqin doğulması haqqındakı xəbəri açıq kinoteatrda seans zamanı alır. O, dostu ilə ikinci pivə şüşəsini içib qurtarırdı. Elə bu zaman qramofondan məlumat verildi: "Stiv Kinq, evə dönün! Arvadınız doğur! Arvadınızın doğumu başlayıb! Stiv Kinq, evə gedin! Arvadınız doğuşdadır!". Verilən xəbər avtomobil siqnallarının kakofoniyası (səslərin qulağa xoş gəlməyən birləşməsi – tərc.) və yanıb-sönən işıqların çıraqbanlığı ilə müşayiət olundu. Kinq bu diqqətdən lap utanıb çaşmışdı. Tamaşaçılar onu bu yolla təbrik edirdilər.

Bəzən düşünülə bilər ki, Stiv və Tabbi aşağı maaşlı bir işdə (Stiv camaşırxanada, Tabbi isə ponçik bişirilən yerdə işləyirdi) işlədikləri zamanlarda iki körpə ağır yük ola bilərdi. Lakin valideynlərdən heç biri uşaqların məhz nə vaxt dünyaya gəlməli olduqlarını planlaşdırmırdı, onlar sadəcə, gəlirdilər və bu gəliş həmişə sevinclə qarşılanırdı.

Kinqlər cütlüyünün ilk nübarı 1970-ci ildə dünyaya gəlir. Qız tez-tez xəstələnirdi. Yazıçı öz xatirələrində yazır ki, qızının həmişə gah qulağı ağrıyır, gah da o, hansısa infeksiyaya yoluxurdu. Yazıçının ailəsindən həyatını yaradıcılığa bağlamayan yeganə şəxs də məhz qızı olur.

Naomi bir müddət restoran biznesi ilə məşğul olur, lakin o, vaxtının çoxunu seksual azlıqların hüquqlarının müdafiəsi üzrə aktiv ictimai fəaliyyətə sərf edirdi. 2005-ci ildə Çikaqoda Texnologiya məktəbində dini kursu bitirdikdən sonra unitar-universal kilsəyə qoşulur: xristian kilsəsinin bu qolu ayrıca təriqət hesab olunur. Bu təriqət əxlaq məsələlərinə liberal yanaşır və xristianlığın ehkamlarını çox sərbəst şərh edirdi. Naomi Kinq dini fəaliyyətə o qədər aludə olur ki, kilsənin din xadiminə çevrilir və hətta təbliğatçılıq fəaliyyətinə görə mükafat da alır.

Ədəbiyyat cığırı: Böyük oğul

"Dəhşətlər kralı"nın iki oğlu valideynlərinin açdığı cığırla gedərək yazıçı olublar.

Böyük oğlu Cosef Hillstrom Kinq 4 iyun 1972-ci ildə Men ştatının Banqora şəhərində doğulub. Onun ilk yaradıcılıq təcrübəsi on yaşında ikən "Dəhşətlər kaleydoskopu" filmində çəkilməsi olur. Və artıq kollecdə oxuyarkən ata-anası kimi özünü ədəbi yaradıcılıqda sınamaq qərarına gəlir. Artıq o zamanlar tanınmış yazıçı olan atasının soy adını işlətməsin deyə, Co Hill təxəllüsündən istifadə edir. Bu bir tərəfdən onun adının qısaldılmış forması idi, digər tərəfdən də XX əsrin əvvəllərində Amerika fəhlə hərəkatının fəallarından birinin adı ilə üst-üstə düşürdü.

Uzun müddət onun hekayələri yalız jurnal və antologiyalarda nəşr olunur və yalnız 2005-ci ildə Вritaniyanın "PS Publishing" nəşriyyatı Co Hillin hekayələrindən ibarət ayrıca kitab nəşr etməyə qərar verir. "İyirminci əsrin kabusları" adlanan bu kitaba yazıçının on dörd kiçik hekayəsi daxil edilmişdi. Cozefin ilk romanı – 2007-ci ildə çıxmış "Ürək şəkilli mücrü" romanı ona atasının şöhrəti ilə müqayisəoluna biləcək bir məşhurluq gətirir. "Uorner Brazərs" kino şirkəti hələ rəsmi nəşrdən əvvəl kitabın ekranlaşdırılması hüquqlarını alır. Tənqidçilər yazırlr ki, oğlu Stiven Kinqi ötüb keçə bilər və ya ən azından onunla ləyaqətlə rəqabət apara bilər. Nəşr olunmuş ikinci romanı "Buynuz"u son onilliyin ən yaxşı mistik trillerlərindən biri kimi dəyərləndirirlər. Yalnız 2007-ci ildə öz güc və itedadı ilə məşhurluq qazanandan sonra hər kəsə bəyan edir ki, Co Hill –Stiven Kinqin varisidir. Cozef Kinq hazırda həyat yoldaşı ilə Yeni İngiltərədə yaşayır və yazmaqda davam edir.

İkinci oğul

Ailənin son beşiyi Ouen Fillip Kinq 1977-ci ildə doğulub. Ouenin yeddi yaşı olanda saksafon musiqisinə meyil edir və bir müddət bu alətdə çalmaq arzusu ilə yaşayır. Valideynləri Milad bayramında ona saksafon alır və çalmağı öyrənmək üçün müəllim də tuturlar. Ouen yeddi ay ciddi-cəhdlə məşğul olur, lakin yalnız müəllimin onunçün təyin etdiyi qədər, artıq deyil. O, çox tezliklə anlayır ki , saksafon onluq deyil. Ancaq bunu etiraf etməyə çəkinirdi. Xoşbəxtlikdən Stiven Kinq uşağın həvəsi olmadığını görür və musiqi təhsilini yarımçıq qoymağı təklif edir.

Saksafondan kitaba

Ouen kollecdə yazıçılığa həvəsini büruzə verir. İlk kitabı 2005-ci ildə, yəni böyük qardaşının debüt kitabı ilə eyni vaxtda işıq üzü görür. Bu, novellalardan və üç kiçik hekayədən ibarət kitab ("We're All in This Together") ədəbi tənqidçilərdən yüksək qiymət alır. Bir dəfə intervü zamanı jurnalist ondan soruşur: "Stiven və Tabita Kinqlərin övladı olmaq necədir?" Kiçik Kinq belə cavab vermişdi: "Çoxları elə bilir ki, adın məşhurluğu bir yazıçı kimi mənə üstünlük gətirir. Ancaq bu, eyni dərəcədə həm də narahatlıqdır. Çünki öz istedad və fərdiliyini isbatlamaq üçün daha çox səy göstərməli, daha çox çalışmalı olursan". Başqa bir vaxt isə Ouen belə izah edir: "Mən var gücümlə nə isə tamam başqa bir tərzdə, üslubda yazmağa, yalnız mənə məxsus bir şəkildə yaratmağa, müstəqil olmağa çalışdım".

Ouen atasından və Cozefdən fərli olaraq dəhşət və mistika yanrında yazmır və onlar qədər məşhur da deyil. Taleyin qismətindən Ouen yazıçı Kelli Braffetlə ailə həyatı qurub.

1999-ci ilin yazında Kinqlərin ilk nəvəsi dünyaya gəlir – Etan - Cozefin və Leanoranın oğlu. Kim bilir, bəlkə o da sülaləni davam etdirəcək və dəhşət romanları yazacaq.