Rusiyanın “Rossiya 24” kanalında Azərbaycan neft sənayesi haqqında xüsusi reрortaj yayımlanıb.

Report xəbər verir ki, “Bakı barreli” adlı reportajda Heydər Əliyev adına Neft Emalı Zavodunun modernizasiyası və yenidənqurulması, Azərbaycanda sənaye üsulu ilə ilk neftin hasilatı, II Dünya müharibəsində qələbədə Azərbaycan neftinin rolu, gələn həftə Bakıda keçirilməsi nəzərdə tutulan OPEK və qeyri-OPEK ölkələrinin Müştərək Texniki Komissiyasının və Nazirlərin Birgə Monitorinq Komitəsinin iclası, Azərbaycan Dövlət Neft Şirkətinin (SOCAR) ticarət qolu - “SOCAR Trading”in fəaliyyəti, həmçinin Rusiyanın enerji şirkətləri ilə əlaqələrdən bəhs edilib.

Reрortajda Azərbaycan Prezidenti İlham Əliyevin Davosda OPEK+ razılığı ilə bağlı fikirləri də yer alıb.

Azərbaycanın Energetika naziri Pərviz Şabhazov OPEK+ çərçivəsində razılaşmadan, Azərbaycanın üzərinə götürdüyü öhdəlikdən, Rusiya şirkətləri ilə əlaqələrdən, SOCAR-ın marketinq və sərmayələr üzrə vitse-prezidenti Elşad Nəsirov şirkətin layihələrindən, SOCAR-ın Marketinq və İqtisadi Əməliyyatlar İdarəsinin rəisi Ədnan Əhmədzadə “SOCAR Trading”in uğurlu fəaliyyətindən, Rusiyanın "Lukoyl” şirkətinin rəhbəri Vahid Ələkbərov şirkətin paya sahib olduğu “Şahdəniz” layihəsindən danışıb.