"Əsrin o üzü" layihəsində

​

Cavid Hüseyn 1965-ci ildə Təbriz şəhərində anadan olub. Anası əslən Naxçıvandan, məşhur Kəngərli nəslindəndir. Atası isə təbrizlidir. Cavid Hüseyn Təbrizdə boya-başa çatıb, orada orta təhsil alıb.

20 yaşında təsadüfən tanınmış bəstəkar Əli Səlimi ilə tanış olub. Söhbət "Sizə salam gətirmişəm", "Ayrılıq", "Babək" operasının və yüzlərlə mahnının bəstəkarından gedir. Əli Səlimi Cavid Hüseyni 20 yaşı münasibəti ilə ilk dəfə televizyaya dəvət edib. 1985-ci ildən Cavid Hüseyn Radio və televizyada assolist kimi fəaliyyətə başlayıb. 1989-cu ilə kimi Şimali Azərbaycan həsrəti ilə Təbrizdə yaşayıb.

Cavid bəylə görüşüb söhbət etdik:

- Cavid bəy, necəsiz?

- Çox sağ olun, yaxşı olasınız.

- Cavid bəy, ilk dəfə Azərbaycana nə vaxt gəlmisiz? İstərdik bununla bağlı oxucularımızla həyat hekayənizi paylaşasız.

- 1989-cu ildə sərhədlər açılanda həsrətiylə yanıb tutuşduğum ana vətənim Naxçıvana gəlmişik. Burada bir müddət qaldıqdan sonra yenidən Təbrizə qayıtdıq.

- Bəs necə oldu siz yenidən Azərbaycanda yaşamağa qərar verdiniz?

- 1991-ci ildə yenidən Azərbayacana gəldik. 1996-cı ilə qədər müxtəlif növ incəsənət işləriylə məşğul oldum. 1997-cı ildə Konservatoriyaya qəbul oldum. SSRİ Xalq artisti Lütfiyar İmanovdan dərs almışam. Üçüncü kursda isə Fidan və Xuraman Qasımova bacıları mənim müəlliməm oldu. Onlar səsimi dinlədilər, bəyəndilər. Çox qurur duyuram ki, bu qədər nüfuzlu müəllimlərim olub. Nəhayət, mən 2003-cü ildə magistraturanı da bitirdim. Amma 1999-cu ildən başlayaraq Azərbaycanın xaricdəki diasporu tərəfindən xarici olkələrdə konsertlərim təşkil olunurdu. Məsələn, Kanada, Avstraliya, Amerika, Fransa, Almaniya, Rusiya, Gürcüstan, Ukrayna, Hindistan və bir çox ölkələrdə konsertlərdə iştirak etmişəm. 2009-cu ildən isə Azərbaycan İncəsənət Universitetində estrada fakültəsində müəllim olaraq dərs deyirəm. Bu gün bir çox tanınmış gənc ifaçılar tələbələrim olub.

- Cavid bəy istərdik ailəniz haqqında danışasız…

- Bu mənim üçün də maraqlıdır. 1989–cu ildə Sevinc xanımla ailə həyatı qurmuşuq, iki övladımız var. Oğlumun adı Hüseyn, qızımın adı Emilyadır. Qızım çox isdedadlıdır – bir-iki filmə də çəkilib. Eldar Quliyevin "Girov" tamaşasında rol alıb, uğurlu da iştirak edib. İndi isə roman yazır. O, vaxtı ilə "Mən uşaq olsam da" uşaq proqramının ən sevimli iştirakçısı idi. Yoldaşım da bəstəkardır, məni də məşhurlaşdıran yoldaşım Sevinc xanımın bəstələdiyi "Səndən ayrı" mahnısı oldu.

- Övladlarınızdan sizin yolunuzu davam etdirən varmı?

- Yox, davam etdirən yoxdur. Mən bunu istəməzdim, heç imkan da verməzdim ki, uşaqlarım müğənni olsun. Çünki mən də, yoldaşım da musiqidə gördüyümüzü görmüşük. Demək olar ki, musiqiyə dəyər verən yoxdur. Övladlarımın da mənim kimi əziyyət çəkməsini istəməzdim.

- Siz oxuduğunuz mahnıların puluyla dolanırsız, ya başqa biznes fəaliyyətiniz var?

- Çox sağ olun, bu da olduqca maraqlı sualdır. Mənim iki diskim yayımlanıb. Populuyar mahnılarım var. "Ay gözü, qaşı qara qız", "Səndən ayrı", sonra Fikrət Əmirovun "Mən səni araram" mahnılarını oxumuşam. Altı klipim var.

- Cavid bəy, siz Azərbaycanda ustad olaraq kimi görürsüz?

- Mənim aləmimdə Rəşid Behbudov və Əbülfət Əliyev nömrə birdir. Amma Flora Kərimova bir məktəbdir. Briliyant Dadaşova, Aybəniz Haşımova, Tünzalə Ağayeva da bir məktəbdir ki, yetişiblər və yetişdirirlər. Klassik musiqidə Azər Zeynalov, korifey sənətkar kimi Yalçın Rzazadənin adını çəkə bilərəm. Doğurdan da bu adını sadaladıqlarım yaşayan əfsanələr, qaymaqlarımızdır. Bunlar sözün əsil mənasında məktəbdirlər.

- Azərbaycan musiqisi haqqında nə deyə bilərsiz?

- Məncə, bütün dünya musiqisini birləşdirsən belə, bizim musiqiyə çatmaz. Musuqimiz çox zəngindir. Azərbaycan musiqisi elə bir musiqidir ki, bütün dünya musiqisiylə ayaqlaşa bilər. Amma heç bir xalqın musuqisi bizim musiqimizlə ayaqlaşa bilməz.

- Cavid bəy, Azərbaycan musiqisiylə fars musiqisinin fərqi nədir? Hansı musiqi daha zəngindir?

- Vallah, mən Azərbaycan musiqisini dünya musiqiylə müqayisə edərdim. Fars musiqisi sünnəti, bəsit musiqidir. Fars musiqisi hansısa bir tayfaya, elə aid olan musiqidir. Onların hətta musiqilərinin forması belə yoxdur. Amma bizim musiqini rəhmətlik Üzeyir Hacibəyov formaya saldı, mükəmməlləşdirdi. Məsələn, onlarda klassik əsərlər, simfoniyalar yazılmır. Bizim "Bayatı Şiraz"ı, "Şur"u, Niyazinin "Rast"ını onlar yaza bilmirlər. Düzdür, onların musiqisi şirindir, amma yenə deyirəm, o musiqi məhəllə musiqisidir, bəşəri deyil.

- Siz xarici musiqilərdən, məsələn, hind musiqilərini ifa edirsizmi?

- Hind musiqisini çox sevirəm. Məsələn, Rac Kapurun həm aktıyorluğunu, həm də oxumasını çox sevmişəm. Bəli, mən hind musiqisi də ifa edirəm. Rac Kapurun "Cənab 420", "Avara" nahnılarını ifa etmişəm. Eyni zamanda onu da deyim ki, 2003-cü ildən 2013-cü ilədək "Muskomediya"da aktyorluq etmişəm. Oynadığım komediyalardan "Bir saatlıq xəlifə", "Romeo mənim qonşumdur", "Əlin cibində olsun" kimi tamaşaların adını çəkə bilərəm.

- Bəs, Azərbaycan ədəbiyyatı haqqında nə deyə bilərsiz?

- Məncə, Azərbaycan musiqisi nə qədər zəngindirsə, ədəbiyyatı da bir o qədər zəngindir. Mən kitaba, şeirə çox həvəsi olan adamam. Özüm də oxuya-oxuya şeir yazıram. İstərdim bir-iki bənd deyim, oxucularımız üçün:

Amandır dostlarım, can sirdaşlarım

Köçməyin qürbətə, qərib olmayın.

Acıdır qəriblik hər qəm-kədərdən

Başqa-başqa yurdu cənnət sanmayın.

Deməyin doğmadır seçdiyim diyar

Heç yağı düşməni qardaş sanmayın.

- Filmlərdə musiqi səsləndirmə, ya hansısa filmdə rol alma kimi bir arzunuz varmı?

- Tez-tez qastrollarda oluram. Amma 2015-ci il yanvar ayının 10-da "Muğam mərkəzi"ndə öz konsertim olacaq. Qaldı, özümü sənətçi hesab etməyə, bəli, mən 30 ildir incəsənətdəyəm, xalqıma xidmət edirəm. Bu uzun yolda mənə həyat yoldaşım çox böyük dəstək olub, ona minnəddaram.

- Musiqi, ailə, vətən?..

- Musiqi həyatdır! Ailə həyatın mənasıdır. Vətən isə hər şeydir. Hər şeydən öncə vətən gəlir. Vətənsizlər bilir vətənin qədrini, vətənin nə olduğunu. Mən bu taydan o taya gedib-gəldiyim üçün çox yaxşı bilirəm vətənin nə olduğunu. Sabah əmr gəlsə ki, Qarabağda döyüşlər başladı, hamıdan əvvəl gedərəm döyüşə. Sizə də öz dərin təşəkkürümü bildirirəm ki, bizləri unutmursuz, kimlərəsə xatırladırsız...