İndoneziyanın Şərqi Yava əyalətinin Gesikan kəndində qəribə hadisə yaşanıb.

Axar.az “Asia One” portalına istinadən xəbər verir ki, hər şey motosikl qəzası ilə başlayıb. Belə ki, qəza keçirən motosikl sürücüsü tanınmaz hala düşüb və onun üzərində şəxsiyyəti təsdiq edən hər hansı sənəd olmayıb.

Polis nömrədən nəqliyyat vasitəsinin 40 yaşlı Sunarto adlı şəxsə məxsus olduğunu müəyyən edib və beləliklə, ölənin məhz o olduğuna qərar verilib.

Cəsəd Sunartonun ailəsinə təhvil verilib və dəfn edilib.

Lakin “torpağa tapşırılan” Sunarto 7 saatdan sonra evə qayıdıb. O, bir müddət əvvəl Varim adlı dostundan borc aldığını, qarşılığında isə öz motosiklini girov qoyduğunu yaxınlarına izah edib.

Bununla da qəzada ölənin Varim olduğu üzə çıxıb.

Varimin ailəsi cəsədi məzardan çıxarmağa lüzum görməyib, sadəcə məzar daşındakı ad və soyad dəyişdirilib.