"Toyxana" layihəsində

Bu sözləri Axar.az-a müsahibə verərkən "Toyxana" layihəsini bugünkü qonağı "Məni axtar darıxanda" mahnısının müəllifi və ifaçısı, gənc müğənni Emil Xan dedi.

Birinci yeri tutdum

- Səhnəyə ilk gəlişinizdən danışaq.

- İlk dəfə səhnəyə gələndə 11 yaşım var idi. Həvəsim oxumağa deyil, pianoda ifa etməyə idi. Evimizin yanında musiqi məktəbi var idi və bacım orda kamançadan dərs alırdı. Onun müəllimləri məni görüb bəyəndilər və elə oldu ki, məndə orda təhsil alası oldum. Məktəbdə oxuyarkən elə olimpiadada "Sevgili canan"ı oxudum və birinci yeri tutdum.

- Gənc müğənnilərdən sizi fərqləndirən nədir?

- Hərənin öz səs diapazonu var və nə ilə fərqləndiyimi tamaşaçı deyə bilər.

"Qanqamstayl" tipli layihə gəlir...

- Hansı yeni layihələriniz var?

- Yeni bir layihəm var. Bu, bütün dünyaya səs salacaq. "Qanqamstayl" tipli bir layihə olacaq.

- Həmin layihəni ərsəyə gətirmək üçün sponsorunuz varmı?

- Sponsor sözündən zəhləm gedir və bu barədə danışsam, heç kimə sərf eləməyəcək. Fərq etməz, istər kişi müğənnisi, istərsə də qadın müğənnisi olsun.

- Bu gün şou-biznesdə qalmaqal rəqabəti əvəz edib, razısınız?

- Elə müğənnilər olub ki, deyiblər "sənə bu qədər pul verirəm, mənə söz at və gündəmdə qalım". Təbii ki, razı olmamışam.

Yekəxana olmaram.

- Emil Xan başqa müğənnilər kimi "ulduz" olmaq həvəsindədir, yoxsa öz sözünü demək üçün gəlib bu sənətə?

- Rəhmətlik Hüseyn Dərya bir gün mənə belə bir sual verdi: "Bu sənətə gəlməkdə məqsədin nədir?" Mən ilk növbədə səsimi və istedadımı nümayiş eləmək üçün gəlmişəm bu sənətə. Gələcəkdə çox tanınmış müğənni insan olsam belə, başqaları kimi yekəxana olmaram. Bu sənətə gələndə nə qədər çirkin insanlarla qarşılaşdım və həmin çətinliklərdən keçdim.

- Çoxu bu sənətə pul qazanmaq üçün gəlir. Razısınız?

- Çoxu elə düşünür ki, müğənnisənsə - varlısan və ən bahalı maşını idarə edirsən. İnanın bu hamısına aid deyil. Kim nə üçün gəlib deyə bilmərəm, mən istedadımı üzə çıxarmaq üçün bu sənətdəyəm.

Nuri Sərinləndirici ağzının danışığını bilmir

- Şou-biznesin bugünkü vəziyyəti sizi qane edirmi?

- Müğənnilərin çoxu ağzının danışığını bilmir. Efir adamısansa, bu sənətdəsənsə nitq qabiliyyətin olmalıdır. Düşünmürlər ki, danışdıqları hər sözə diqqət yetirməlidirlər. Bu yaxınlarda bir çəkilişdəydik və bir kişi müğənnisi ağzından elə bir söz çıxardı ki, mən utandım. Hətta belə deyim, həmin şəxs Azərbaycanın öndə gedən kişi müğənnilərindən biridir. Şəxsən mən özüm də onun mahnılarını ifa edirəm, yəni o dərəcədə sevilən müğənnidir. Verilişdən sonra ayaqyolunun yerini soruşurdu və bu cürə müraciət etdi: "Buranın konservatoriyası haradır?". Şəxsən bu mənə pis təsir etdi. Axı Konservatoriya bizim tədris ocağımızdır, ana-bacılarımız orada təhsil alır.

- Əgər gündəmdə qalan açıqlama verirsinizsə, bəlkə ad çəkəsiniz?

- Mən qalmaqal yaratmaq niyyətində deyiləm, amma əgər soruşursunuzsa deyəcəm. Həmin şəxs məşhur müğənni Nuri Sərinləndiricidir. O, ağzının danışığını bilmədi.

- Bilirik ki, toylara gedirsiniz. Hansı məbləğə?..

- Mən heç vaxt toyu başdan axıra kimi idarə etmirəm. Saatla gedib oxuyub çıxıram və heç bir zaman məbləğ deyib durmuram. İlk olaraq toya getdiyim şəxsin maddi imkanı ilə maraqlanıram, sonra müəyyən bir məbləğ deyirəm.