Hazırda ermənilərin yaşadığı Kut kəndi tarixi Azərbaycan torpağıdır. Ermənilərin özləri də etiraf edirlər ki, onlar 33 ildir Kut kəndində məskunlaşıblar.

Bunu Axar.az-a açıqlamasında Azərbaycan MEA Tarix İnstitutunun “Qarabağ Tarixi” şöbəsində böyük elmi işçisi, tarixçi Bəxtiyar Həsənov deyib.

Bəxtiyar Həsənov qeyd edib ki, sözügedən kəndin adı Kut deyil:

“Kut kəndi Zod yataqlarına yaxındır. Elə buna görə də kəndin adı Zod yataqları ilə bağlıdır və qızıl mədənlərinə görə kənd Zərzibil, sonra isə Zərkənd adlandırılıb. 1988-ci ilə qədər Kut kəndinin bütün əhalisi Azərbaycan türkləri olub. Orda təxminən 370 ailə yaşayıb. 33 il əvvəl azərbaycanlılar Kut kəndindən deportasiya olunublar, elə həmin ildə erməniləri ora köçürüblər. Hazırda da həmin kənddə təxminən 50-60 ailə yaşaya bilər”.

Qeyd edək ki, ötən həftə Nikol Paşinyanın Kut kəndinə səfəri zamanı yerli sakinlə dialoqu böyük müzakirəyə səbəb olmuşdu. Yerli sakin ermənilərin 33 il əvvəl Kuta köçdüklərini və türkləri (azərbaycanlıları) buradan qovduqlarını kameralar önündə bildirmişdi.