Professor Ziqmund Freyd güclü qadınlara qarşı iradəsiz olub.

Bu qadınlardan biri Lou Andreas Salomey idi. Nitsşenin aşiq olub evlənmə təklifi etdiyi böyük alman şairi Rilkenin gənclik illərində "xəstə" bir məhəbbət yaşadığı və Freydin məşhur iclaslarında iştirak icazəsi verdiyi yeganə qadın. Lou Salome özü analizdən keçməsə də, Freydin icazəsi ilə Berlindəki ilk psixoanaliz xəstəxanasını açmışdı. Freydin həyatına girən digər güclü qadın isə Napoleonun nəslindən olan Danimarka və Yunanıstan şahzadəsi Mariya Bonapart idi.

O, Freydin yanına analizə görə gələn, daha sonra isə Fransada psixoanalizin inkişafında müstəsna rol oynayanlardan biri idi. Hətta Freydi düşdüyü nasist problemindən xilas etmişdi. Məhz o, professorun Londona qaçmağında mühüm rol oynamışdı.

Freydin həyatına girən və ömrünün sonunacan həyatında qalan başqa güclü bir qadın isə Minna Bernays olub. O, Freydlə nişanlanan Martanın bacısı idi. Minna bacısına nisbətən daha intellektual, cəsarətli və ağıllı idi. O, Freyddən 9 yaş balaca idi. Minna İqnaz Şoenberqlə nişanlı idi. Lakin Şoenberq 24 yaşında vərəmdən dünyasını dəyişdi. Minan bu hadisəni unutmağa və yenidən həyata qayıtmağa çalışsa da, həyatının sonuna qədər evlənmədi.

Böyük yahudi burjua ailəsi olan Bernayslar qızlarının yoxsul bir həkimlə evlənməyinə razı ola bilmirdilər. Bu səbəbdən ailə hər kəsdən gizli nişanlanan cütlüyü bir-birindən ayırmaq ümidilə Hamburqa köçür. Bu hadisədən sonra bankir atanın müflis olmağı və dünyasını dəyişməsi Barneyslər ailəsini çıxılmaz vəziyyətdə qoyur. Bütün bunlara baxmayaraq, Martanın anası Freydin normal pul qazanacağı günə qədər onlara evlənməyə icazə verməməkdə təkid edir.

Aylar, illər ötüb keçdi. Martayla sevgilisinin evliliyi 4 il gözləmək məcburiyyətində qaldı. Freyd bu vaxtda Parisə məşhur psixiatr olan Çarkotun yanına gedir. Bundan sonra sevgilsii Marta ilə məhəbbətini məktublar vasitəsilə davam etdirir. Marta yazdığı məktublarda gecələr yatmadığını etiraf edirdi...

1881-ci ildə 20 yaşlı, irigözlü, solğun bənizli Marta ilə Freydin qarşılaşması ilk baxışdan məhəbbət idi. Ziqmund Freydin onda 26 yaşı var idi.

1876-cı ildə cinsi münasibətlərin insan psixologiyasına təsiri haqqında başlatdığı müayinə və seminarların şöhrəti tezliklə bütün Avropaya yayıldı. Çox keçmədi ki, Freydin ofisi çoxsaylı nevrotik qadınlarla dolub-daşdı. Xoşbəxt cinsəl həyatı olmayan adamda yuxu pozuntuları, baş ağrıları, qarın ağrısı, panika, nevroz olacağını Freyd çox yaxşı bilirdi. Freyd öz bildiklərini insanlarla bölüşmək istəsə də, fikirlərinin ictimaiyyət tərəfindən birmənalı qarşılanmayacağını bilirdi. Maraqlısı budur ki, həyat yoldaşı Marta ərinin həyatını həsr etdiyi bu sahə ilə heç vaxt maraqlanmadı. O, Freydin fəaliyyətini çəkinmədən "pornoqrafik" adlandırırdı.

Xəstələrinin danışdığı hadisələrlə öz uşaqlığında baş verənləri xatırlayan Freyd şəxsi yuxularının analizi ilə yeni mülahizələr irəli sürür, özündən də xəbərsiz yeni ideyalar kəşf edirdi. Doğum kontroluna qarşı olan Feydin 6 uşağı var idi. Bu səbəbdən Freyd özü öz cinsi həyatına son qoymuşdu.

1895-ci ildə ən yaxın dostu olan Doktor Fliessə yazdığı məktubda cinsi həyatına bilərəkdən son qoyduğunu və bundan sonra özünü ölü kimi hiss etdiyini yazmışdı. Paradoksal səslənsə də, XİX əsr Avropasına öz cinsi mülahizələri və ideyaları ilə damğasını vuran doktor Freyd özü öz xoşu ilə cinsi həyatından imtina etmək məcburiyyətində qalmışdı.

Minna Freydin həyatına məhz bu ərəfədə daxil olur. Martanın bacısı Minna pulsuzluqdan Freydgilin evinə köçür və onlarla birgə yaşamağa başlayır. Birlikdə kokain çəkib şərab içdikləri məlum olan Freydlə Minna haqda çoxvariantlı yazılar var. Hələ ki, heç bir araşdırmaçı Minnayla Freydin arasındakı səmimi münasibətin intellektual yaxınlaşma, yoxsa cinsi münasibətlər zəminində meydana gələn bağlılıq olduğunu müəyyən edə bilməyib. Minnayla Freydin münasibətlərindən xəbərdar olan yeganə dostu Yunqun bu barədə verdiyi bəyanat da araşdırmaçıların şübhəsini dağıtmağa kifayət etmədi. Bəzi mütəxəssislər Yunqun "Freydlə Minna arasında cinsi münasibətlər və məhəbbət mövcud idi" açıqlamasını, onun Freydi gözdən salamq cəhdi kimi dəyərləndirdi.

Freydin arvadı Marta səyahətləri sevmirdi. Bu səbəbdən professor səyahət edərkən arvadının bacısı – Minnanı yanında aparırdı.

13 avqust 1898-ci ildə İsveçrədə ən gözəl istirahət məkanlarından birinə yollanan Freydlə Minnanın otelə daxil olarkən apardıqları qeydiyyat illər sonra otel arxivindən çıxarılıb ictimaiyyətə təqdim olundu. Qeydiyyat zamanı Freyd öz ad və soyadının yanına Minnanın adını "həyat yoldaşım" olaraq qeyd etmişdi.

Freydlə Minnanın arasında mövcud olan münasibətlərə çox kitab həsr olunub. Bunlardan biri də "Freydin fahişəsi" kitabıdır. Sözügedən kitabın müəllifləri Karen Mak və Cennifer Kaufmandır. Bu müəlliflər çoxsaylı Freyd bioqrafiyalarından istifadə edərək cütlüyün münasibətlərini roman halına salıblar. Minnanın ehtiras dolu məhəbbətini, bacısına qarşı duyduğu vicdan əzabını, duyğusal eniş-yoxuşlarını çox gözəl təsvir ediblər.