Artıq 8 gündür ki, Bakıda və Abşeronda “Kənddən Şəhərə” Yeni il yarmarkaları fəaliyyət göstərir. Əksəriyyəti isə bir sual düşündürür: qiymətlər marketlərdən fərqlənirmi?

Axar.az-ın əməkdaşı “Gənclik” metrostansiyasının yanında yerləşən yarmarkada müşahidə aparıb.

Alıcılar bildiriblər ki, bazar və marketlərə nisbətən yarmarkada qiymətlər ürəkaçandır, lakin bəzi məhsullar bazar qiyməti ilə eynidir.

Yarmarkada əzgilin qiyməti 0,50-1,50, kinxan 3 manat, xurma 0,70-2 manat, portağal 1-2 manat, naringi 1 manat-1,50, heyva 0,60, kivi 0,80-1,20, nar 1 manat, yerli qreyfurt 2 manat, armud 1 manatdır.

Bazarda 1,30-a satılan fuji alması yarmarkada 1 manata, 0,80-ə olan ağ palment, simerinka, siqanka 0,60-dır.

Lənkəran limonunun 5 dənəsini yarmarkada 1 manata almaq mümkündür.

Soğan 0,45-0,80, kartof 0,50-1,10, sarımsaq 4,50, göyərtinin 7 dəstəsi 1 manatdır. Hazırda mövsümü olmayan pomidor 1,20-1,30, xiyar 2,60-dır.

Tərəvəzlər isə bazarda olduğu kimidir: çuğundur 80 qəpik, qırmızı turp 70 qəpik, kələm 1 manatdır. Badımcan 1,50-1,80-dir. Astara doşabı 8 manat, bal isə 20-30 manat arasında dəyişir.

Xama 6 manat, pendir 5-14 manat, şor 3-3,50-dir. Yumurta 0,25-0,30, yağ 12-15 manatdır. Toyuq 5-6 manat, qoyun əti 11 manatdır. Müxtəlif çeşiddə qablaşdırılmış turşunun 1 kiloqramı 3 manata satılır.

Qeyd edək ki, “Gənclik” metrostansiyasının yanı, Binəqədi rayonu Süleyman Sani Axundov küçəsi 5B (“İnqilab” kinoteatrının yanı), Xırdalan şəhəri, Heydər Əliyev prospekti 41A-da təşkil olunan yarmarka dekabrın 30-na kimi səhər saat 10:00-dan axşam 19:00-a qədər fəaliyyət göstərəcək.