Axar.az-ın "Səhv düşəndə yerimiz" layihəsində iki ayrı peşə sahibinə sualların yerini dəyişərək verməklə və alınan cavabların nöqtə-vergülünə toxunmamaqla reaksiyaları, bilgi spektrini və yumor hissini yoxlamağa, bununla da həm müsahiblərimizi, həm oxucularımızı əyləndirməyə çalışacağıq. "Səhv düşəndə yerimiz" layihəsinin budəfəki qonaqları müğənni Manaf Ağayev və politoloq İlqar Vəlizadədir.

– Miqrasiya nədir və müasir dövrdə yaşanan miqrasiya böhranının qarşısını necə almaq olar?

Manaf Ağayev (müğənni): "Bilmirəm. Mənim ixtisasım olmadığına görə dəqiq cavab verə bilməyəcəm, amma düşünürəm ki, yeganə çıxış yolu müharibədir. Mən belə başa düşürəm ki, qan tökülməlidir, başqa yolu yoxdur, yoxsa müharibənin qarşısı alınmaz".

Düzgün cavab: Miqrasiya insanların bir ölkədən digər ölkəyə həmişəlik və ya uzun müddətə köçməsinə deyilir.

– Süita nədir və Azərbaycan bəstəkarlarının hansı süitalarını tanıyırsınız?

İlqar Vəlizadə (politoloq): "Süitanın nə olduğunu dəqiq deməyə çətinlik çəkirəm. Amma Üzeyir Hacibəyovun "Qəhrəmanlıq" süitasının adını çəkə bilərəm".

Düzgün cavab: Süita – bir neçə tamamlanmış pyesdən ibarət silsilə əsərdir. Obraz məzmununa və quruluşuna görə fərqlənən pyeslər kontrastlıq prinsipi ilə növbələşir. XVI əsrdə İtaliyada meydana gəlmiş və professional musiqidə geniş yayılmışdır. Asəf Zeynallının Uşaq süitası, Qara Qarayevin Azərbaycan süitası, Sərdar Fərəcovun Simfonik və Balet süitası olduqca məşhurdur.