"Röya Ayxanın Kreml Sarayındakı konsertinin təşkilatçısı Azərbaycan Mədəniyyət Mərkəzidir. Biz bilet satışına və təşkilatçılığa qarışmırıq".

Bu sözləri "Axar.az"a açıqlamasında Röya Ayxanın prodüseri Kənan Bayramov bildirdi. Onun sözlərinə görə, bilet ajiotajı və tapılmaması ilə bağlı məlumata malik deyillər:

"Sizin bu xəbərinizdən biz ancaq sevinə bilərik. Röya xanımın konsertinə bu qədər diqqətin olacağını hesabladıqları üçün təşkilatçılar Kremlin böyük zalını kirayələyiblər".

K.Bayramov bilet satışına qarışmasalar da, qiymətlər haqda məlumatlı olduqlarını dedi: "Bildiyim qədərincə, biletlər 8-12 min rubl (təxminən 170-255 manat) civarındadır".

O ki qaldı Röyanın konsertdən alacağı qonorara, mətbuat katibi bunun kommersiya sirri olduğunu söylədi: "Bu barədə biz heç vaxt açıqlama vermirik. Bu bizim sirrimizdir".

Xatırladaq ki, Röya Ayxan aprelin 18-də Kreml Sarayında konsert verəcək. Moskvada yaşayan soydaşlarımızın məlumatına görə, qiymətlərin kifayət qədər baha olmasına rəğmən, artıq konsertə bilet tapmaq müşkülə çevrilib.