Əgər əllərində bu məsələ ilə bağlı sübut varsa, ortaya çıxarsınlar.

Bu sözləri əməkdar artist Mətanət İsgəndərlinin mətbuat katibi Zəminə Rüstəmova müğənninin MTN-nin agenti olması ilə bağlı keçmiş Beynəlxalq Universitetin keçmiş rektoru Elşad Abdullayevin yaydığı məlumat haqda Axar.az-a danışarkən deyib. O, müğənninin bu ittihamla bağlı danışmayacağını bildirib:

"Mətanət xanımın özünə bu haqda məlumat vermirik. O, heç bir şəkildə bu məsələlərlə bağlı narahat olunmaq istəmir. Qarşı tərəfin bütün ittihamları absurddur".

Qeyd edək ki, Azərbaycan Beynəlxalq Universitetinin sabiq rektoru, hazırda Fransada yaşayan Elşad Abdullayev "Hürriyyət" qəzetinə göndərdiyi məktubda "Mətanət İsgəndərli həmişə MTN-in birinci müavini, KQB generalı Hilal Əsədovun agenti olub, onunla işbirliyində olub. Hilal Əsədov da Mətanəti bu günə qədər həbslərdən qoruyub", - yazıb. Sabiq rektorun iddiasına görə, qardaşı Mahir Abdullayev Mətanət İsgəndərlinin evindən oğurlanıb.