“Orginal Hermes Birkin” çantası dünən Parisdə keçirilən hərracda 7 milyon avroya (təxminən 10 milyon dollar) satılıb.

Axar.az xəbər verir ki, bu barədə Türkiyə mətbuatı məlumat yayıb.

Məlumata görə, sözügedən istifadə olunmuş, üzəri cızıqlı çanta 1984-cü ildə aktrisa, müğənni və stil ikonu Jane Birkin üçün hazırlanıb. Qiyməti ilə rekord qıran açıq çanta hərracını “Sotheby’s” şirkəti həyata keçirib.

“Birkin” çantası bir neçə dəfə istifadə olunsa da, sahibinin ona verdiyi fərdi toxunuşlarla - yapışqan kağız izləri, dəriyə dəyən cızıqlar və digər fərdi işarələrlə daha da dəyər qazanıb.

Üstəlik, çantada prototip mərhələsini keçə bilməmiş bəzi orijinal detallar da mövcuddur. Qara dəridən hazırlanan çantanın hündürlüyü 40 sm, dərinliyi və eni 35 sm-dir. Əlavə olaraq çarpaz şəkildə taxıla bilən bir kəmərə də malikdir. Ən diqqətçəkən detal isə ön hissədə möhürlənmiş “J.B.” hərfləridir.

10 dəqiqə keçirilən hərrac yaponiyalı şəxsi çanta kolleksiyaçısının qələbəsi ilə başa çatıb.