Özbəkistanın Kun.uz portalı qədim Naxçıvan haqqında məqalə yayıb.

Məqalədə bildirilir ki, bu qədim diyar haqqında Quran, Tövrat, Bibliya kimi müqəddəs kitablarda məlumat var. Bu kitablarda Böyük Daşqın, Nuh və onun ailəsi, Nuhun gəmisi haqqında söhbət açılır.

Qeyd olunur ki, Naxçıvanın ən qədim və müqəddəs abidəsi Nuhun muzeyi hesab edilir. Əfsanəyə görə, Nuh burada öz ailəsi üçün ev tikib, burada yaşayıb və burada da dəfn edilib. Mavzoleyin ən qədim dövrü eradan əvvəl 1500-cü ilə aiddir.

Bildirilir ki, bu torpaq dünya siyasətinə və elminə onlarla böyük insanlar bəxş edib. Onların arasında dünya şöhrətli siyasətçi Heydər Əliyev, böyük şair Hüseyn Cavid, memar Əcəmi Naxçıvani, Heyran xanım və digərləri var.

Məqalədə Xudafərin körpüsü, Əlincə qalası, Möminə Xatun türbəsi, Nuhun türbəsi, Qarabağlar abidəsi haqqında da məlumat verilir.

Yazıda adları çəkilən böyük tarixi şəxsiyyətlərin və qədim abidələrin fotoşəkilləri də verilib.