İsrail və Misir arasında 2040-cı ilə qədər təbii qaz tədarükünə dair 35 milyard dollar dəyərində ixrac müqaviləsi imzalanıb.

Axar.az Teleqraf-a xəbər verir ki, bu barədə İsrail Baş nazirinin ofisində müşavir olan Dmitri Hendelman məlumat verib.

Onun sözlərinə görə, bu müqavilə İsrailin tarixində imzalanmış ən böyük ixrac sazişidir. Razılaşmaya əsasən, "NewMed Energy" şirkəti "Leviafan" yatağından Misirə ümumilikdə 130 milyard kubmetr təbii qaz ixrac edəcək.

Tədarük iki mərhələdə həyata keçiriləcək. Birinci mərhələdə, artıq bu ildən başlayaraq, Misirə təxminən 20 milyard kubmetr qaz göndəriləcək. İkinci mərhələ isə Leviafan qaz hasilatı platformasının genişləndirilməsi başa çatdıqdan sonra başlayacaq və əlavə 110 milyard kubmetr qazın ixracını əhatə edəcək.

Müşavirin sözlərinə görə, bu razılaşma iki ölkə arasında tərəfdaşlığı daha da möhkəmləndirəcək və ən azı 2064-cü ilə qədər uzunmüddətli enerji infrastrukturunun əsasını qoyacaq. Müqavilə, eyni zamanda, Misirin mayeləşdirilmiş qaz zavodunun modernləşdirilməsini də əhatə edir.

Hendelman bildirib ki, "Leviafan" qaz yatağının 600 milyard kubmetr həcmində təbii qaz ehtiyatına malik olması İsrailin regional enerji bazarında əsas və etibarlı oyunçu kimi mövqeyini möhkəmləndirir.

Ərəb tərəfdaşlarla iqtisadi əlaqələrin inkişafına və Şərqi Aralıq dənizində sabitliyin təmininə töhfə verir.