Qlobal iqlim dəyişikliyi Orta Şərq ölkələrini ciddi susuzluqla üz-üzə qoyub. Türkiyə və İranla yanaşı, Suriyada və İraqda da quraqlıq ciddi narahatlıq yaradıb.

Axar.az xəbər verir ki, İran Prezidenti Məsud Pezeşkian ölkədə su ehtiyatlarının “təəccüblü dərəcədə” tükəndiyini açıqlayıb: “Əgər həll yolu bilən varsa, irəli çıxsın. Bizim başqa seçimimiz yoxdur".

Beş illik quraqlıq və yüksək temperatur barajları demək olar ki, tamamilə qurudub, yeraltı su ehtiyatları isə ciddi təhlükə siqnalı verir.

Türkiyədə də vəziyyət kritikdir. Meteoroloji məlumatlara görə, 2024-2025-ci su ilində ölkə üzrə yağışlar son 52 ilin ən aşağı səviyyəsinə düşüb. Quraqlıq kənd təsərrüfatına ağır zərbə vurub.

Ekspertlər xəbərdarlıq edirlər ki, su böhranı yalnız kənd təsərrüfatını deyil, həmçinin tekstil, ərzaq sektorlarını və enerji resurslarını da təhlükəyə atır. Eyni zamanda quraqlıq sosial narahatlıq, miqrasiya və regional sabitliyin pozulmasına səbəb ola bilər.

Suriyada son 10 ildə davam edən müharibə və infrastruktura vurulan ziyan quraqlığı daha da dərinləşdirib. 2023-2024-cü su ilində ölkədə yağışlar 50% az olub.

İraqda da Tigris və Fərat çaylarının səviyyəsinin azalması güney bölgələrdə torpağın duzlaşmasına və məhsuldarlığın düşməsinə səbəb olub. 2024-2025-ci su ilində ölkədə yağışlar 40% azalıb.

Ekspertlər vurğulayır ki, quraqlığın yaratdığı risklərin aradan qaldırılması üçün süni su resursları, müasir su idarəçiliyi, quraqlığa davamlı bitki növləri və regional əməkdaşlıq zəruridir.