Dnepropetrovsk vilayətindəki döyüşlər Rusiya qoşunlarının sərhəd boyu sanitar zonalar yaratmaq taktikasının bir hissəsidir.

Axar.az xəbər verir ki, bunu ukraynalı hərbi ekspert Vladislav Seleznev deyib.

Onun sözlərinə görə, regionda hərbi əməliyyatların intensivləşməsi Rusiyanın Ukrayna ərazisinə dərindən irəliləmək və müharibənin ümumi gedişatına təsir etmək istəyi ilə bağlıdır:

“Hələ ötən ilin mayında Putin öz ordusu üçün dəqiq vəzifə müəyyənləşdirmişdi - Rusiya ilə həmsərhəd olan ərazilərində qondarma bufer zonaları yaratmaq. O zaman söhbət Xarkov, Sum və Çerniqov vilayətlərinin ərazilərindən gedirdi.

Ancaq Rusiya konstitusiyasının yeni redaktəsinə baxsaq, görərik ki, orada Xerson və Zaporojye, eləcə də Luqansk və Donetsk vilayətləri Rusiya Federasiyasının tərkib hissəsidir - ən azından Putin və onun ətrafının xəyal etdiyi budur”

Ekspert bildirir ki, Rusiya hakimiyyəti öz məntiqinə əsaslanaraq, özünün bir hissəsi hesab etdiyi Ukraynanın vilayətləri ilə həmsərhəd olan həmin rayonların ərazilərində sanitar zona yaratmalıdır və odur ki, Dnepropetrovsk vilayətində döyüşlər təsadüfi deyil.