Türkiyə Prezidenti Rəcəb Tayyib Ərdoğan və Qətər əmiri Şeyx Təmim bin Həməd arasında telefon danışığı baş tutub.

Axar.az xəbər verir ki, bu barəd Türkiyə Prezident Administrasiyasının İctimaiyyətlə Əlaqələr İdarəsinin məlumatında deyilir.

Bildirilib ki, söhbət zamanı İsrailin Dohada HƏMAS hərəkatının nümayəndələrinə hücumu və buna cavab olaraq atılacaq birgə addımlar müzakirə edilib.

"Ərdoğan İsrailin münaqişəni daha da gərginləşdirmək, bölgədə gərginliyi, qeyri-sabitliyi artırmaq və dost və müttəfiq Qətərin suverenliyini açıq şəkildə pozmaq məqsədi daşıyan hücumunu pisləyib", - məlumatda vurğulanıb.

Ərdoğan bu hücum nəticəsində insan itkisi ilə bağlı başsağlığı verib və Türkiyənin Qətər və xalqını tam dəstəkləyədiyini deyib.

Hər iki lider Qəzzada insan tələfatına tez bir zamanda son qoymaq üçün birgə işləməyə davam etmək barədə razılığa gəliblər.