Rusiya PUA-larının Polşaya hücumu vəziyyətində ABŞ Prezidenti Donald Tramp passiv müşahidəçi kimi çıxış etdi.

Axar.az xəbər verir ki, bu barədə “Nyu York Tayms” qəzetindəki məqalədə bildirilir.

Məqalədə qeyd edilib ki, Ağ Ev rəhbəri Rusiya PUA-larının Polşaya müdaxiləsi ilə bağlı heç bir sərt açıqlama verməyib, hətta sosial şəbəkələrdə qəribə paylaşımla kifayətlənib.

“Rusiyanın Polşa hava məkanını PUA-larla pozması ilə bağlı nələr baş verir? Başlayır”, - deyə hadisədən bir neçə saat sonra Tramp yazıb.

Məqalədə vurğulanıb ki, bu, indiyədək hər kəsi Ukrayna və Yaxın Şərqdə sülhə yalnız onun nail ola biləcəyinə inandıran Trampın bu dəfə özünü müşahidəçi rolu ilə məhdudlaşdırmasının nümunəsi idi:

“Bu, qəribə ziddiyyətdir. ABŞ prezidenti açıq şəkildə dünyada altı, hətta daha çox münaqişəyə müdaxilələrinə görə Nobel Sülh Mükafatına sahib olmağa can atır. Eyni zamanda isə deyir ki, bunun üçün çox da bir şey edə bilmir. Hətta “Nə etmək olar?” deyirərək çiyinlərini çəkir”.

Həmçinin əlavə edilib ki, Rusiya Prezidenti Vladimir Putinin "qırmızı xətləri" keçmək üçün səbəbləri var. Çünki Alyaskada baş tutan görüşdən sonra Trampın vəd etdiyi Ukrayna və Rusiya prezidentlərinin birbaşa danışıqları və Rusiyaya qarşı sanksiyalar və s. heç biri həyata keçmədi.