Nepalın yeni təyin olunan müvəqqəti Baş naziri Suşila Karki vəzifəsini altı ay ərzində yeni hökumətə təhvil verəcək.

Axar.az xəbər verir ki, bu barədə Karki açıqlamasında deyib.

Karki martın 5-də keçiriləcək seçkilərdən sonra formalaşacaq hökumətə yerini verəcəyini deyib. O, bu vəzifəni könüllü olaraq qəbul etmədiyini, xalq etirazlarının təsiri ilə razılaşdığını bildirib.

Yeni baş nazir vurğulayıb ki, "Z nəsli” hərəkatının tələbləri - korrupsiyanın aradan qaldırılması, yaxşı idarəçilik və iqtisadi bərabərlik hökumətin əsas istiqamətləri olacaq.

Suşila Karki keçmiş Ali Məhkəmə sədri olub və təmiz imici ilə tanınır. Lakin o, bu müddətdə impiçment cəhdi ilə üzləşib.

Qeyd edək ki, Karkinin təyinatı ölkədə korrupsiyaya qarşı keçirilən və 70-dən çox insanın ölümü ilə nəticələnən kütləvi aksiyalardan sonra baş tutub. Etirazlara sosial şəbəkələrin qadağan olunması səbəb olub. İki gün davam edən iğtişaşlar zamanı siyasətçilərin evləri dağıdılıb, parlament binası yandırılıb.