Körfəz Əməkdaşlıq Şurası və Avropa Birliyinin xarici işlər nazirləri İrandan Birləşmiş Ərəb Əmirliklərinə aid olan üç adanın işğalına son verməsini tələb ediblər.

Axar.az xəbər verir ki, bu haqda nazirlərin birgə bəyanatında bildirilib.

“Körfəz Əməkdaşlıq Şurasının Nazirlər Şurası və Avropa Birliyinin xarici işlər nazirləri İranın Birləşmiş Ərəb Əmirliklərinə aid Böyük Tunb, Kiçik Tunb və Əbu Musa adalarının işğalını davam etdirməsini pisləyir və buna son verməsini tələb edir”, - birgə bəyanatda qeyd olunub.

Bəyanatın yayılmasından sonra İran Xarici İşlər Nazirliyinin sözçüsü İsmail Bəqai Böyük və Kiçik Tunb və Əbu Musa adalarını “İranın ayrılmaz hissəsi” adlandırıb və bununla bağlı iddiaların təkrarlanmasını pisləyib.

Məsələ ilə bağlı Avropa Birliyi ölkələrinin səfirləri və diplomatik nümayəndələri də İran Xarici İşlər Nazirliyinə çağırılıb.