ABŞ Prezidenti Donald Trampın rusiyalı həmkarı Vladimir Putinlə Alyaskanın Ankoric şəhərində baş tutan görüşü gərgin anlarla yadda qalıb. Məlumata görə, Tramp danışıqlar zamanı bir neçə dəfə səsini qaldırıb və hətta görüşü dayandırmaqla hədələyib.

Axar.az xəbər verir ki, bu barədə “Faynənşl Tayms” qəzeti mənbələrə istinadən məlumat yayıb.

Nəşrin yazdığına görə, görüş əvvəlcə səmimi şəkildə - əl sıxma və Trampın geniş təbəssümü ilə başlayıb. Lakin qapalı qapılar arxasında isti atmosfer tezliklə soyuyub:

“Rusiya lideri ABŞ-ın sanksiyaların yumşaldılması müqabilində atəşkəsin elan olunması təklifini rədd edib. Danışıqlarda yalnız hər iki tərəfdən bir neçə müşavir iştirak edib. Putin müharibənin yalnız Moskvanın tələbləri yerinə yetirildikdə başa çata biləcəyini vurğulayıb. Görüş zamanı Putin rus tarixi fiqurlarından - Ryurik, Yaroslav Mudrıy və XVII əsr kazak atamanı Boqdan Xmelnitskidən də bəhs edib. Bu məqam Trampı çaşdırıb, o bir neçə dəfə səsini qaldırıb və danışıqları tərk edəcəyini bildirib. Nəticədə Tramp görüşü yarımçıq saxlayıb və əvvəlcədən planlaşdırılmış işgüzar naharı ləğv edib”.

Qeyd edək ki, bu ilin avqustun 15-də Alyaskanın Ankoric şəhərində ABŞ Prezidenti Donald Trampla Rusiya Prezidenti Vladimir Putin arasında görüş keçirilmişdi.