Hazırda davam edən sülh axtarışı üzrə danışıqlar diplomatik oyundur.

Axar.az xəbər verir ki, bunu ukraynalı tarixçi professor Yaroslav Qritsak deyib.

“İlin əvvəlindəki şərtlərlə ilin sonundakı şərtlər eyni deyil, aralarında fərq var. Tərəflər sözlərlə müəyyən güzəştlərə razılıq verirlər. Bu isə, əlbəttə, atəşkəsin olacağı demək deyil, çünki iki tərəf arasındakı məsafə çox böyükdür. Diplomatların dediyi kimi, bu, “dəhliz strategiyası”dır: Tramp Ukrayna və Rusiyanı dar bir dəhlizə salmaq istəyir ki, orada onlar bir-biri ilə üz-üzə gəlsinlər”, – deyə o bildirib.

O vurğulayıb ki, bunun baş verməsi üçün Tramp Rusiyaya qarşı daha tələbkar olmalıdır:

“Amma hələlik bu müşahidə edilmir. Tramp administrasiyası Rusiyanı Çindən uzaqlaşdırmaq istəyir və məhz buna görə də Trampın Rusiyaya münasibəti Ukraynaya nisbətən “xeyli daha yumşaqdır”. Bundan əlavə, yalnız gücə hörmət edən Tramp hesab edir ki, Rusiya gücə malikdir, Ukrayna isə yox.

Hələ Putin olduğu müddətdə sülh mümkün deyil. Mən tez-tez Koreya müharibəsi ilə analogiya gətirirəm: danışıqlar 1949-cu ildə başlamışdı, amma yalnız Stalinin ölümündən sonra başa çatdı. Yəni danışıqların yekunlaşması üçün şərt Stalinin ölümü idi”.