Arktikanın təhlükəsizliyi Avropada sabitlik üçün birinci dərəcəli əhəmiyyət daşıyır.

Axar.az xəbər verir ki, bunu Finlandiyanın müdafiə naziri Antti Hyakkyanen bildirib.

Onun sözlərinə görə, Avropada nüvə çəkindiriciliyi ilə bağlı müzakirələr arzuolunandır, lakin hazırda onlar NATO-nu əvəz edə bilməz.

Nazir həmçinin qeyd edib ki, Rusiya Arktikada strateji aktivlərini gücləndirir və Finlandiya ilə sərhəd boyunca yeni obyektlər inşa edir. O vurğulayıb ki, Arktika Avropa müdafiəsi üçün “kritik” əhəmiyyətə malikdir:

“Rusiya özünün ən böyük strateji imkanlarının – nüvə silahlarının, sualtı qayıqların və uzaqmənzilli bombardmançıların böyük hissəsini Kola Peninsula ərazisində cəmləşdirib. Ruslar Soyuq müharibə dövründə olduğu kimi sərhədimiz boyunca yeni hərbi obyektlər tikirlər. Arktikanı diqqətdə saxlamaq və çəkindirmə məqsədilə arktik imkanları artırmaq məntiqli olardı”.

Qeyd edək ki, Kola yarımadası Rusiyanın şimal-qərbində yerləşən və sahəsi 100 min kvadrat kilometr olan regiondur. Ölkənin dəniz strateji nüvə arsenalının böyük hissəsi – o cümlədən sualtı qayıqlar, eləcə də uzaqmənzilli aviasiya vasitələri məhz burada yerləşir.