"Lufthansa" Yaxın Şərqdə mövcud təhlükəsizlik vəziyyətini əsas gətirərək regiona və regiondan bütün uçuşları müvəqqəti dayandırıb.

Axar.az APA-ya istiandən xəbər verir ki, aviaşirkət Təl-Əvivdə Ben Qurion hava limanına və bu aeroportdan həyata keçirilən bütün reysləri martın 7-dək ləğv edib.

Şirkətin açıqlamasında bildirilir ki, qərar “Yaxın Şərqdəki mövcud vəziyyət” nəzərə alınaraq qəbul olunub.

Bundan başqa, Təl-Əvivlə yanaşı, Beyrut, Əmman, Ərbil və Tehran istiqamətlərinə uçuşlar da eyni tarixədək dayandırılıb.

"Lufthansa"ya daxil olan digər aviaşirkətlər – "SWISS", "Austrian Airlines", "Brussels Airlines" və "Eurowings" də sözügedən qərara qoşulub və göstərilən istiqamətlər üzrə reysləri müvəqqəti olaraq ləğv edib.

Şirkət sərnişinlərə alternativ imkanlar təqdim edir. Bildirilir ki, reysləri ləğv olunan sərnişinlər biletlərini əlavə ödəniş etmədən daha sonrakı tarixə dəyişə və ya biletin tam dəyərinin geri qaytarılmasını tələb edə bilərlər.

Açıqlamada qeyd olunub ki, "Lufthansa" Yaxın Şərqdə təhlükəsizlik vəziyyətini davamlı şəkildə izləyir və qiymətləndirir, həmçinin aidiyyəti qurumlarla sıx əlaqə saxlayır.

Qeyd edək ki, regionda artan gərginlik fonunda bir sıra beynəlxalq aviaşirkətlər də təhlükəsizlik səbəbi ilə uçuş cədvəllərinə dəyişiklik edib.

Xatırladaq ki, İsrail və ABŞ bu gün səhər saatlarından İrana qarşı hərbi əməliyyata başlayıb.