Macarıstan və Slovakiya Ukraynanın logistikasına zərər vura bilər.

Axar.az xəbər verir ki, bu barədə “Ekonomik Pravda” yazıb.

Bildirilir ki, Ukrayna mallarının bu iki quru dəhlizi ilə daşınmasının ümumi həcmi böyük deyil. Buna görə də zərər kritik olmasa da, hiss oluna bilər.

Müəlliflərin məlumatına görə, 2025-ci ildə Ukrayna ümumilikdə təxminən 85 milyard dollar dəyərində mal idxal edib, 40 milyard dollardan çox isə ixrac həyata keçirib. Bununla belə, Macarıstan vasitəsilə Ukraynanın ixracının 3%-i, idxalının 2,5%-i, Slovakiya vasitəsilə isə ixracın 2,5%-i və idxalın 2,6%-i həyata keçirilib.

Nəşr qeyd edir ki, Macarıstan Ukrayna üçün enerji və sənaye mallarının tədarükçüsü kimi vacibdir. Ukrayna bu ölkədən ən çox qaz, elektrik enerjisi, minik avtomobilləri, kabel və elektrik avadanlıqları alır.

“Bunlar elə mallar deyil ki, onların olmaması ölkəni bir günə dayandırsın. Amma məhz belə mallar tədarükdə gecikmə olanda biznes xərclərinin sürətlə artmasına səbəb olur”, - nəşr vurğulayıb.

Qeyd edilib ki, Macarıstandan asılılıq kifayət qədər yüksəkdir. Məsələn, bu ölkə Ukraynanın elektrik enerjisi idxalının üçdə birindən çoxunu, kabel və izolyasiyalı naqillərin 26%-ni, izolyasiya armaturunun isə 37%-ni təmin edib.

Slovakiyadan isə Ukrayna neft məhsulları, avtomobillər, elektrik enerjisi və polad prokat alır. Bundan əlavə, Slovakiya Ukraynanın elektrik enerjisi idxalının təxminən beşdə birini, örtülməmiş kağız və karton idxalının 26%-ni, qatran və poliuretanların 17%-ni, həmçinin mərkəzi isitmə qazanlarının 22%-ni tədarük edir.