Qabaqcıl Çin texnologiyalarının istifadəsi səbəbindən Yaxın Şərqdəki Amerika hərbi obyektləri İran raketlərinin hədəfinə çevrilib.

Axar.az xəbər verir ki, bu barədə ABŞ müdafiə kəşfiyyatının informasiyalarına istinadən “ABC Nyus” məlumat yayıb.

Materialda qeyd olunur ki, İran qüvvələri Çin şirkəti “Mizarvision”un peyk görüntülərindən istifadə edir. Süni intellekt sayəsində sistem obyektləri avtomatik tanıyır və işarələyir, bu da ABŞ bazalarını və texnikasını saatlarla deyil, dəqiqələr içində müəyyən etməyə imkan verir.

Rəsmilər xəbərdarlıq edirlər ki, bu imkan hədəfləmə prosesini xeyli qısaldır və ABŞ personalı və aktivləri üçün riskləri artırır. Kommersiya üçün açıq olan məlumatlar demək olar ki, real vaxt rejimində hədəfləmə kəşfiyyatına çevrilir.

Məlumatlara görə, İran İslam İnqilabı Keşikçiləri Korpusu (SEPAH) artıq bu məlumatlardan dron və raket zərbələrinin planlaşdırılmasında istifadə edir. “Mizarvision” sistemi şəkillərdə təyyarələri, yanacaq anbarlarını və radarları müstəqil şəkildə aşkar edə bilir.

Nəşrdə bildirilir ki, bu süni intellekt platforması artıq strateji obyektlərin, o cümlədən Hind okeanındakı Dieqo-Qarsiya hərbi-dəniz obyektinin detallı görüntülərini üzə çıxarıb.

“Army Recognition Group” analitiklərinin qiymətləndirməsinə görə, bu inkişaf müharibənin mahiyyətini dəyişir. İran kütləvi “doydurma” hücumlarından daha çox, hava hücumundan müdafiə radarları, logistika mərkəzləri və təyyarələrin texniki xidmət zonaları kimi kritik nöqtələrin dəqiq məhv edilməsinə keçə bilər.

“Pekin bundan daha artıq şey əldə edir: geomaqnit süni intellekt, operativ xəritələşdirmə və ABŞ qüvvələrinə qarşı strateji kəşfiyyat üçün canlı münaqişə laboratoriyası”, - ekspertlər qeyd edirlər.

Onların fikrincə, Yaxın Şərq gələcək Çin yanaşmalarının – “döyüş əməliyyatlarının şəffaflığı” modelinin sınaq meydanına çevrilib və bu yanaşmalar sonradan Sakit okean regionunda tətbiq oluna bilər. ABŞ üçün isə bu, mürəkkəb siyasi problem yaradır, çünki Çin formal olaraq məsafə saxlayaraq, özəl sektor vasitəsilə İrana “rəqəmsal silahlar” təqdim edə bilər.