Rusiya Xarici İşlər nazirinin müavini Sergey Ryabkov ABŞ Dövlət katibi Con Kerrinin ittihamlarına cavab verib.

Axar.az xəbər verir ki, Moskva rəsmisi təhdid siyasəti ilə ABŞ-ın heç nəyə nail olmayacağını deyib:

"Bu, (Kerrinin açıqlaması. – red.) ABŞ və müştərilərinin lehinə olacaq qərarları zorla qəbul etdirmək məqsədilə tətbiq olunan bir təhdid və şantaj siyasətidir. Bu şəkildə anlaşma əldə etmək olmaz. Bir atı su kənarına gətirə bilərsiniz, amma əsla o atı su içməyə məcbur edə bilməzsiniz.

Bizim də öz maraqlarımız, prinsiplərimiz var. Rusiya və ABŞ arasında Suriya ilə bağlı razılaşma hər kəs üçün uyğun prinsiplər üzərində qurulduğuna görə uzun müddət davam edib. İndi bu razılaşma ABŞ tərəfindən tənqid edilir. Bu, onların seçimidir".

Xatırladaq ki, ABŞ Dövlət katibi Con Kerri Suriyanın Hələb şəhərində hava əməliyyatlarının davam edəcəyi halda Rusiya ilə danışıqların dayandırılacağını açıqlayıb.