Şimon Peresin sayəsində İsrail Baş naziri Benyamin Netanyahu İranın nüvə obyektlərinə aviazərbələr endirməkdən imtina edib.

Axar.az xəbər verir ki, bu barədə informasiyanı "Yerusəlim Post" qəzeti yayıb. Məqalə müəllifi bu haqda informasiyanı iki il əvvəl Şimon Peresdən öyrəndiyini, lakin eks-prezidentin bu məlumatı yazmağı qadağan etdiyini bildirib:

"Peres bizə Netanyahunu İrana zərbə endirmək fikrindən daşındırdığını dedi. O, Netanyahuya bunun nəticələrinin fəlakətli olacağını bildirdi. Biz ondan soruşanda ki, bunu yaza bilərikmi, o, yalnız "mən öləndən sonra" cavabını verdi".

Qeyd edək ki, İsrailin 9-cu prezidenti Şimon Peres sentyabrın 28-də 93 yaşında vəfat edib.

2010-ci ildə Netanyahu və o zamankı müdafiə naziri Ehud Barak İrana hücum etmək istəsələr də, ordu və xüsusi xidmət orqanlarının rəhbərləri buna etiraz ediblər. Bu işdə xüsusilə İsrail Baş Qərargah rəisi Qabi Aşkenazi və MOSSAD-ın rəhbəri Meira Daqana fərqləniblər.